షర్మిల పాదయాత్ర వాయిదా

అనుమతి కోరగా ఎందుకు నిరాకరించొద్దంటూ వరంగల్‌ సీపీ నోటీసు జారీ

వరంగల్‌ క్రైం, నర్సంపేట, చెన్నారావుపేట, న్యూస్‌టుడే: వైతెపా అధ్యక్షురాలు వైఎస్‌ షర్మిల ప్రజాప్రస్థానం పాదయాత్ర వాయిదా పడింది. వరంగల్‌ జిల్లా చెన్నారావుపేట మండలంలో ఆదివారం పాదయాత్ర పునఃప్రారంభం కావాల్సి ఉండగా నేతలు అనుమతి కోరుతూ పోలీసులకు దరఖాస్తు చేశారు. అయితే ఆ దరఖాస్తును ఎందుకు తిరస్కరించకూడదో తెలియజేయాలని వరంగల్‌ పోలీసు కమిషనర్‌ ఏవీ రంగనాథ్‌ శనివారం రాత్రి పార్టీ నాయకులకు షోకాజ్‌ నోటీసు జారీ చేశారు. మొదటిసారి పాదయాత్రకు అనుమతి ఇచ్చిన సమయంలో తాము సూచించిన నియమాలను అతిక్రమించి వ్యక్తిగత దూషణకు పాల్పడటం ద్వారా శాంతిభద్రతలకు విఘాతం కలిగిందంటూ ఆధారాలను దానికి జతచేశారు. ఈ క్రమంలో ఆదివారం ప్రారంభించనున్న పాదయాత్రను వాయిదా వేసుకున్నామని వైతెపా హనుమకొండ, వరంగల్‌ జిల్లాల అధ్యక్షుడు నాడెం శాంతికుమార్‌ తెలిపారు. షర్మిలతో చర్చించి నోటీసులపై నిర్ణయం తీసుకుంటామని చెప్పారు.