నాకు ప్రాణహాని ఉంది: వైఎస్‌ షర్మిల

ఈనాడు, హైదరాబాద్‌: ముఖ్యమంత్రి కేసీఆర్‌, ఆయన అనుచరుల నుంచి తనకు ప్రాణ హాని ఉందని వైతెపా అధ్యక్షురాలు వైఎస్‌ షర్మిల ఆరోపించారు. భాజపా అధ్యక్షుడు బండి సంజయ్‌ యాత్రకు అనుమతి ఇచ్చి తన పాదయాత్రను అడ్డుకోవడంలో ఆంతర్యం ఏంటని ప్రశ్నించారు. ఆదివారం హైదరాబాద్‌ లోటస్‌పాండ్‌లో ఏర్పాటు చేసిన విలేకరుల సమావేశంలో ఆమె మాట్లాడారు. ‘పాదయాత్రకు హైకోర్టు అనుమతి ఉన్నా పోలీసులు కావాలని షోకాజ్‌ నోటీసులు ఇచ్చి అడ్డుకుంటున్నారు. యాత్రలో ఎక్కడా మా పార్టీ శ్రేణులు శాంతిభద్రతలకు విఘాతం కలిగించలేదు.  బాధితులం మేము. పైగా మమ్మల్నే దోషులుగా చూపేందుకు పోలీసుల భుజంపై తుపాకిపెట్టి కాల్చే ప్రయత్నాలను తెరాస చేస్తోంది. కోర్టు ఇచ్చిన అనుమతుల ఉల్లంఘనపై ధిక్కరణ కేసు వేస్తాం.  నేను ఎక్కడా వ్యక్తిగత దూషణలు చేయలేదు. హామీలు నెరవేర్చనందుకు ప్రజల తరఫున ఈ ప్రభుత్వానికే షోకాజ్‌ నోటీసు ఇవ్వాలి. ఒకటి రెండు రోజుల్లో పాదయాత్ర ప్రారంభిస్తా’ అని ఆమె వ్యాఖ్యానించారు.