నాటి బిహార్‌లా నేడు పుంగనూరు

తెదేపా అధినేత చంద్రబాబు ధ్వజం

ఈనాడు డిజిటల్‌, అమరావతి: పుంగనూరులో గత ఎన్నికల్లో జనసేన తరఫున పోటీ చేసిన పారిశ్రామికవేత్త రామచంద్రయాదవ్‌ ఇంటిపై వైకాపా కార్యకర్తల దాడిని తెదేపా అధినేత చంద్రబాబు తీవ్రంగా ఖండించారు. ఒకప్పటి బిహార్‌లా నేడు పుంగనూరు మారిందని మండిపడ్డారు. ‘‘డీజీపీ గారూ...నాలుగు జతల ఖాకీ దుస్తులు మీ స్థానిక అధికారులకు పంపండి. లేకపోతే రాష్ట్రంలో మొత్తం పోలీసు శాఖను మూసేశారనుకుంటారు...’’ అని పేర్కొంటూ సోమవారం చంద్రబాబు ట్వీట్‌ చేశారు. రామచంద్రయాదవ్‌ ఇంటి వద్ద వైకాపా కార్యకర్తలు సృష్టించిన విధ్వంసానికి సంబంధించిన వీడియోను తన ట్వీట్‌కు ఆయన జత చేశారు.