16న రాష్ట్రానికి జేపీ నడ్డా

ఈనాడు, హైదరాబాద్‌: భాజపా జాతీయ అధ్యక్షుడు జేపీ నడ్డా రాష్ట్ర పర్యటనకు రానున్నారు. పార్టీ రాష్ట్ర అధ్యక్షుడు బండి సంజయ్‌ నవంబరు 29న చేపట్టిన అయిదో విడత ప్రజాసంగ్రామ యాత్ర ఈ నెల 16న కరీంనగర్‌లో ముగియనుంది. ఈ సందర్భంగా నిర్వహించే ముగింపు సభకు ముఖ్య అతిథిగా ఆయన హాజరవుతారు. సంజయ్‌ ఎంపీగా ప్రాతినిధ్యం వహిస్తున్న కరీంనగర్‌ జిల్లా కేంద్రంలోనే పాదయాత్ర ముగియనుండటం, పార్టీ జాతీయ అధ్యక్షుడు రానుండటంతో భాజపా ఈ సభను ప్రతిష్ఠాత్మకంగా తీసుకుంది. ఎస్‌ఆర్‌ఆర్‌ కళాశాలలో సభ నిర్వహించి భారీగా జనాన్ని సమీకరించాలని నిర్ణయించింది.

నడిచే దూరం పెంపు

పోలీసుల అనుమతి నిరాకరణ నేపథ్యంలో అయిదో విడత ప్రజాసంగ్రామ యాత్ర గత నెల 28కి బదులుగా 29న ప్రారంభమైంది. ముందు నిర్ణయించిన ప్రకారం 18న పూర్తికావాల్సి ఉంది. పార్టీ అధ్యక్షుడు 16న వచ్చేందుకు సమ్మతి తెలిపిన కారణంగా ఆ రోజుకు యాత్ర ముగించేలా ప్రణాళిక రూపొందిస్తున్నట్టు యాత్ర ప్రముఖ్‌  మనోహర్‌రెడ్డి తెలిపారు. అందుకనుగుణంగా సంజయ్‌ నడిచే కిలోమీటర్లసంఖ్యను పెంచుతున్నట్టు వెల్లడించారు.