వారాహి వాహనంపై విమర్శలు తగవు

జనసేన నేత నాదెండ్ల మనోహర్‌

విశాఖపట్నం (పెదవాల్తేరు), న్యూస్‌టుడే: ప్రభుత్వ కార్యాలయాలకు పార్టీ రంగులు వేసి హైకోర్టుతో మొట్టికాయలు తిన్న వైకాపా.. జనసేన పార్టీ వారాహి వాహనం రంగుల గురించి మాట్లాడటం విడ్డూరంగా ఉందని జనసేన రాజకీయ వ్యవహారాల కమిటీ ఛైర్మన్‌ నాదెండ్ల మనోహర్‌ పేర్కొన్నారు. విశాఖలో గురువారం ఆయన మాట్లాడుతూ.. ఏ రంగు వేశారో చూడకుండా రవాణాశాఖ ఎలా అనుమతిస్తుందని ప్రశ్నించారు. ఉత్తరాంధ్రలో జనసేన పార్టీ చేపట్టబోయే కార్యక్రమాలను శుక్రవారం ప్రకటిస్తామన్నారు. పార్టీ కార్యక్రమాల కోసం ప్రభుత్వ బస్సులు వాడుకోవడం సిగ్గుచేటన్నారు. 14 ఎకరాలు కాజేసిన వ్యక్తిని ప్రశ్నించిన అనంతపురం జన సైనికుడు సురేష్‌పై దాడికి పాల్పడ్డారని ఆగ్రహించారు. అన్నమయ్య ప్రాజెక్టు పరిధిలో జనసేన పార్టీ పర్యటన ఉందని తెలియడంతో వెంటనే ఖాతాల్లో డబ్బు వేశారన్నారు.