కాంగ్రెస్‌, భాజపాలే జాతీయ పార్టీలు: జగ్గారెడ్డి

ఈనాడు, దిల్లీ: దేశంలో జాతీయ పార్టీలంటే కాంగ్రెస్‌, భాజపాలేనని సంగారెడ్డి ఎమ్మెల్యే జగ్గారెడ్డి అన్నారు. దిల్లీలో ఏఐసీసీ అధ్యక్షుడు మల్లికార్జున్‌ ఖర్గేను గురువారం ఆయన కలిశారు. అనంతరం విలేకరులతో మాట్లాడారు. తెరాస భారాసగా మారడంపై స్పందిస్తూ ఎన్నికల సంఘానికి ఎవరు దరఖాస్తు పెట్టుకున్నా అనుమతిస్తారని తెలిపారు. మమతా బెనర్జీ, చంద్రబాబు వంటి నేతలే జాతీయ పార్టీలు పెట్టి విజయం సాధించలేకపోయారన్నారు. హైదరాబాద్‌ దాటని ఎంఐఎం కూడా ఇతర రాష్ట్రాల్లో పోటీ చేస్తోందన్నారు. ఇతర రాష్ట్రాల్లో కాంగ్రెస్‌ నష్టపోవడానికి ఎంఐఎం, ఇతర చిన్న పార్టీలే కారణమన్నారు. రాష్ట్ర కాంగ్రెస్‌ నాయకత్వంపై అందర్నీ కలుపుకొని వెళ్లాలని ఖర్గేకు చెప్పానన్నారు. రాష్ట్ర నాయకత్వంపై తనకు ఎటువంటి ఫిర్యాదులు లేవన్నారు. రాష్ట్రంలో కాంగ్రెస్‌ లేదనిపించేందుకే తెరాస, భాజపా కలిసి పనిచేస్తున్నాయని ఆయన ఆరోపించారు.