‘షర్మిల మోదీ ఏజెంట్‌’

ఈనాడు, హైదరాబాద్‌: వైతెపా అధ్యక్షురాలు షర్మిల భాజపాతో చీకటి ఒప్పందం కుదుర్చుకున్నారని, తెలంగాణలో ఉంటూ ప్రధాని మోదీకి ఏజెంట్‌గా పనిచేస్తున్నారని తెరాస ఎమ్మెల్సీ డి.రాజేశ్వర్‌రావు, నామినేటెడ్‌ ఎమ్మెల్యే స్టీఫెన్‌సన్‌ ధ్వజమెత్తారు. తెలంగాణలో అల్లర్ల కోసం ఆమె కుట్ర చేస్తున్నారని, ఇందులో భాజపా ప్రధాన పాత్ర పోషిస్తోందని ఆరోపించారు. భాజపాకు వ్యతిరేకంగా వైఎస్‌ పోరాడితే.. ఆ పార్టీ పంచన చేరి షర్మిల ఆయన పరువు తీస్తోందని విమర్శించారు. గురువారం తెరాస శాసనసభాపక్ష కార్యాలయంలో వారు విలేకరులతో మాట్లాడారు. ‘‘ఏపీ నుంచి వచ్చిన షర్మిల తెలంగాణలో శాంతియుత వాతావరణాన్ని చెడగొట్టాలని ప్రయత్నించడం సరికాదు. ఆమె అర్థం లేని విమర్శలు ఆపాలి’’ వారు కోరారు.