Udhayanidhi Stalin: తమిళనాడు సీఎం తనయుడికి మంత్రి పదవి

చెన్నై, న్యూస్‌టుడే: తమిళనాడు ముఖ్యమంత్రి స్టాలిన్‌ తనయుడు ఉదయనిధికి రాష్ట్ర మంత్రిపదవి ఖాయమైంది. బుధవారం ఉదయం 9.20 గంటలకు రాజ్‌భవన్‌లో ఆయన ప్రమాణస్వీకారం చేయనున్నారు. ఉదయనిధిని మంత్రివర్గంలోకి తీసుకోవాలన్న స్టాలిన్‌ ప్రతిపాదనను గవర్నర్‌ ఆమోదించినట్టు రాజ్‌భవన్‌ ఓ ప్రకటనలో వెల్లడించింది. 2021 శాసనసభ ఎన్నికల్లో చెన్నైలోని చేపాక్‌-ట్రిప్లికేన్‌ నియోజకవర్గం నుంచి డీఎంకే అభ్యర్థిగా ఉదయనిధి తొలిసారిగా గెలిచారు. ‘వారసత్వ రాజకీయాలు తగవు’ అంటూ చర్చ సాగడంతో అప్పట్లో ఆయన్ను మంత్రివర్గంలోకి తీసుకోలేదు. తాజాగా ఆయనకు యువజన సంక్షేమం, క్రీడాభివృద్ధి శాఖను కేటాయించనున్నట్టు తెలుస్తోంది.