భాజపాకు ఎప్పుడూవ్యతిరేకమే: కేకే

ఈనాడు, దిల్లీ: భాజపాకు తాము ఎప్పుడూ వ్యతిరేకమేనని తెరాస పార్లమెంటరీ పార్టీ నేత కె.కేశవరావు అన్నారు. 12 మంది రాజ్యసభ సభ్యులను సమావేశాల నుంచి సస్పెండ్‌ చేయడాన్ని వ్యతిరేకిస్తూ కాంగ్రెస్‌ ఆధ్వర్యంలో పార్లమెంట్‌ ఆవరణలో చేపట్టిన ఆందోళనలో ఆయన పాల్గొన్నారు. ఈ సందర్భంగా మీడియాతో ఆయన మాట్లాడుతూ జాతీయ ప్రయోజనాల దృష్ట్యా కొన్ని బిల్లులకు మద్దతు ఇచ్చామని తెలిపారు. తాము గతంలోనూ అంశాల వారీగా విపక్ష నేతలతో పలు సమావేశాలు ఏర్పాటు చేశామన్నారు. రాజ్యసభ సభ్యుల సస్పెన్షన్‌పై విపక్షాలన్నీ ఐక్యంగా ఉన్నాయని, ఈ విషయంలో భాజపా ప్రభుత్వాన్ని వ్యతిరేకిస్తున్నాయని తెలిపారు. రాష్ట్రంలో ధాన్యం కొనుగోళ్ల అంశంలో విపక్షాలతో  కలిసి ఆందోళన చేస్తామన్నారు.