పొరుగు రాష్ట్రం ఎంపీల్లా వైకాపా సభ్యులు పోరాడలేరా?

తెదేపా ఎంపీ రామ్మోహన్‌నాయుడు

ఈనాడు, దిల్లీ: ప్రత్యేక హోదా.. విశాఖ రైల్వే జోన్‌, వెనుకబడిన జిల్లాలకు నిధులు వంటి హామీలపై వైకాపా ఎంపీలు పార్లమెంటులో ఎందుకు ప్రశ్నించడం లేదని తెదేపా లోక్‌సభాపక్షనేత కె.రామ్మోహన్‌నాయుడు ధ్వజమెత్తారు. రాజ్యసభ సభ్యుడు రవీంద్రకుమార్‌తో కలిసి దిల్లీలో గురువారం ఆయన విలేకరులతో మాట్లాడారు.  ‘22 మంది లోక్‌సభ, ఆరుగురు రాజ్యసభ సభ్యుల బలం ఉన్నా... పార్లమెంటులో ఎందుకు మాట్లాడడం లేదు? పొరుగు రాష్ట్రం తెలంగాణ ఎంపీలు ధాన్యం సమస్యపై వెల్‌లోకి వెళ్లి బైఠాయిస్తుంటే వైకాపా ఎంపీలకు ఎందుకు దమ్ము సరిపోవడం లేదు? ప్రత్యేక హోదా ముగిసిన అంశమని, విశాఖ ఉక్కు ప్రైవేటీకరణపై మరో ఆలోచన లేదని కేంద్రం లిఖితపూర్వకంగా చెప్పినా ఎందుకు గట్టిగా అడగలేకపోతున్నారు’ అని ఆయన నిలదీశారు.