ఎస్పీ గూటికి స్వామిప్రసాద్‌ మౌర్య

మరో తాజా మాజీ మంత్రి ధరమ్‌సింగ్‌ కూడా..

లఖ్‌నవూ: అసెంబ్లీ ఎన్నికలు సమీపిస్తున్నవేళ ఉత్తర్‌ ప్రదేశ్‌లో మంత్రి పదవికి, భాజపా సభ్యత్వానికి రాజీనామా చేసిన స్వామి ప్రసాద్‌ మౌర్య ఊహించినట్లుగానే సమాజ్‌వాదీ పార్టీ (ఎస్పీ) తీర్థం పుచ్చుకున్నారు. మరో తిరుగుబాటు మంత్రి ధరమ్‌సింగ్‌ సైనీతో కలసి శుక్రవారం ఎస్పీ అధినేత అఖిలేశ్‌ యాదవ్‌ సమక్షంలో ఆ పార్టీలో చేరారు. స్వామిప్రసాద్‌.. ఓబీసీ సామాజిక వర్గంపై గట్టి పట్టున్న నేత. ఆయన చేరికతో రాష్ట్రవ్యాప్తంగా యాదవేతర ఓబీసీల్లో ఎస్పీ బలం పెరిగే అవకాశముందని విశ్లేషణలు వెలువడుతున్నాయి. మరోవైపు- కమలదళం నుంచి ఇటీవల బయటికొచ్చిన ఐదుగురు ఎమ్మెల్యేలు- భగవతి సాగర్‌, రోషన్‌లాల్‌ వర్మ, వినయ్‌ శక్య, బ్రిజేష్‌ ప్రజాపతి, ముకేశ్‌ వర్మ, అప్నాదళ్‌ పార్టీ శాసనసభ్యుడు అమర్‌సింగ్‌ చౌధరీ కూడా అఖిలేశ్‌ సమక్షంలో తాజాగా సమాజ్‌వాదీ కండువా కప్పుకొన్నారు. ఈ సందర్భంగా పార్టీ కార్యాలయం వద్దకు జనం పెద్దఎత్తున తరలిరావడంతో.. కొవిడ్‌ నిబంధనల ఉల్లంఘన పేరిట కేసు నమోదైంది.