UP: మేం గెలిస్తే ఇద్దరు సీఎంలు: యూపీలో ఒవైసీ హామీ

లఖ్‌నవూ: ఎన్నికల వేళ.. ఉత్తర్‌ప్రదేశ్‌లో ఏఐఎంఐఎం అధ్యక్షుడు అసదుద్దీన్‌ ఒవైసీ. కొత్త కూటమి ప్రకటించారు. జన్‌ అధికార్‌ పార్టీ, బీఏఎంసీఈఎఫ్‌లతో కలిసి ‘భాగీదారీ పరివర్తన్‌ మోర్చా’ను ఏర్పాటు చేస్తునట్లు శనివారం తెలిపారు. తమ కూటమిని గెలిపిస్తే ఐదు సంవత్సరాల కాలంలో ఓబీసీ నుంచి ఒకరు, దళితుల నుంచి ఒకరు ముఖ్యమంత్రులుగా ఉంటారని పేర్కొన్నారు. అలాగే ముగ్గురు ఉప ముఖ్యమంత్రులు ఉంటారని, అందులో ఒకరు ముస్లిం వర్గానికి చెందిన వారిని ఎంపిక చేస్తామని తెలిపారు. కూటమికి జన్‌ అధికార్‌ పార్టీ అధ్యక్షుడు బాబు సింగ్‌ కుశ్వాహా నేతృత్వం వహిస్తారని ప్రకటించారు. బాబు సింగ్‌ గతంలో మాయావతి ప్రభుత్వంలో మంత్రిగా పనిచేశారు.