ఓబీసీ నేతల వలసలు భాజపాపై ప్రభావం చూపవు

యూపీ ఉప ముఖ్యమంత్రి కేశవ్‌ప్రసాద్‌ మౌర్య

లఖ్‌నవూ: ఇటీవలి కాలంలో పలువురు ఓబీసీ మంత్రులు, శాసనసభ్యులు భాజపా నుంచి బయటకు వెళ్లిపోయిన ప్రభావం పార్టీ విజయావకాశాలపై ఏమాత్రం కనిపించదని యూపీ ఉప ముఖ్యమంత్రి కేశవ్‌ప్రసాద్‌ మౌర్య ధీమా వ్యక్తంచేశారు. అన్నివర్గాల ప్రజలకు ప్రధాని నరేంద్ర మోదీ నాయకత్వంపై నమ్మకం ఉందని చెప్పారు. మార్చి 10న ఫలితాలు వెలువడిన తర్వాత సమాజ్‌వాదీ, కాంగ్రెస్‌ పార్టీల నేతలెవరూ కనిపించరని ఆదివారం ఒక వార్తాసంస్థకు ఇచ్చిన ముఖాముఖిలో చెప్పారు. ‘‘పోలింగ్‌ బూత్‌ స్థాయి వరకు భాజపా బలంగా ఉంది. ఇతర పార్టీల్లోకి వెళ్లిన నేతల వెంట కార్యకర్తలెవరూ వెళ్లలేదు. భాజపా అధికారంలోకి వచ్చాక శాంతి భద్రతలు మెరుగుపడ్డాయి. అభివృద్ధి పనులు జరిగాయి. విపక్షాలన్నీ ఏకతాటిపైకి వచ్చినా భాజపాయే బలంగా ఉంటుంది. యూపీలో నిరుడు సార్వత్రిక ఎన్నికల్లోనూ ఇదే రుజువైంది’’ అని మౌర్య వివరించారు. ఆలయాలను భాజపా ఎన్నడూ ఎన్నికలతో ముడిపెట్టదన్నారు.