త్వరలోనే మా మంత్రిని అరెస్టు చేస్తారు: కేజ్రీవాల్‌

దిల్లీ: పంజాబ్‌ అసెంబ్లీ ఎన్నికలు సమీపిస్తున్న వేళ మరోసారి కేంద్ర ప్రభుత్వ సంస్థలను ప్రయోగించేందుకు భాజపా సిద్ధమవుతోందని దిల్లీ ముఖ్యమంత్రి అరవింద్‌ కేజ్రీవాల్‌ ఆరోపించారు. ఆమ్‌ ఆద్మీ పార్టీ నేత, దిల్లీ మంత్రి సత్యేంద్ర  జైన్‌ను ఈడీ అధికారులు త్వరలో అరెస్ట్‌ చేస్తారనే సమాచారం ఉందని తెలిపారు. ఇప్పటికే రెండుసార్లు జైన్‌ ఇంట్లో ఈడీ అధికారులు సోదాలు చేశారని, మళ్లీ వచ్చినా స్వాగతిస్తామని ఆమ్‌ఆద్మీ పార్టీ అధినేత చెప్పారు. తనతో సహా ఆమ్‌ ఆద్మీ ఎమ్మెల్యేలందరినీ అరెస్ట్‌ చేసినా తాము భయపడేది లేదన్నారు. ‘‘మేము చన్నీ(పంజాబ్‌ సీఎం) మాదిరి కన్నీరు కార్చం. ఆయన(చన్నీ)కి ఎందుకంత నైరాశ్యం? తప్పు చేశారు కాబట్టే. ఈడీ అధికారులు పెద్దపెద్ద నోట్ల కట్టలు స్వాధీనం చేసుకున్నారు. ఎలాంటి తప్పులు చేయలేదు కాబట్టి మేము భయపడం. అన్ని కేంద్ర సంస్థలను పంపాలని కేంద్రం, భాజపాలకు సూచిస్తున్నాను. మేమంతా సిద్ధంగానే ఉన్నాం. సత్యేంద్ర జైన్‌ మాత్రమే కాదు, మా ఇంటికి, మనీశ్‌ సిసోడియా, భగవంత్‌ మాన్‌ ఇంటికి పంపండి. మీ అందరికీ స్వాగతం’’ అని  కేజ్రీవాల్‌ అన్నారు.