దేవుడిపై ఒట్టు.. పార్టీ మారబోం

  గోవా నేతలతో ప్రమాణం చేయిస్తున్న కాంగ్రెస్‌

పణజీ: పార్టీ ఫిరాయింపులకు సంబంధించిన గత అనుభవాలు కాంగ్రెస్‌ను ఇంకా వెంటాడుతూనే ఉన్నాయి. ఈ నేపథ్యంలో గోవా కాంగ్రెస్‌ కీలక నిర్ణయం తీసుకుంది. వచ్చే నెలలో జరగబోయే ఎన్నికల్లో బరిలో నిలవనున్న అభ్యర్థులతో ప్రమాణం చేయించింది. తాము గెలిస్తే పార్టీ మారబోమని ఈ మేరకు భగవంతునిపై ఒట్టు వేయించింది. మొత్తం 34 మంది అభ్యర్థులను ప్రత్యేక బస్సులో రాష్ట్రంలోని వివిధ దేవాలయాలు, చర్చిలు, దర్గాలకు తీసుకెళ్లి పార్టీ ఫిరాయింపులకు పాల్పడబోమని దేవుని ఎదుట ప్రమాణం చేయించారు కాంగ్రెస్‌ పెద్దలు. కాంగ్రెస్‌ నుంచి ఎన్నికల పరిశీలకుడిగా ఉన్న సీనియర్‌ నేత చిదంబరం ఆధ్వర్యంలో ఈ కార్యక్రమం జరిగింది.