యోగిని ఓడిస్తా.. చరిత్ర తిరగరాస్తా

గోరఖ్‌పుర్‌లో ఆయన ప్రత్యర్థి చంద్రశేఖర్‌ ఆజాద్‌

దిల్లీ: ఉత్తర్‌ప్రదేశ్‌ ముఖ్యమంత్రి యోగి ఆదిత్యనాథ్‌ను గోరఖ్‌పుర్‌లో ఓడించి, 1971 ఎన్నికల నాటి పరిణామాన్ని పునరావృతం చేస్తానని ఆయన ప్రత్యర్థి, ఆజాద్‌ సమాజ్‌ పార్టీ (ఏఎస్‌పీ) అధ్యక్షుడు చంద్రశేఖర్‌ ఆజాద్‌ చెప్పారు. యోగి కంచుకోటలో ఆయన్ని ఢీకొనడం గురించి ఏమాత్రం భయపడడం లేదని ఒక వార్తాసంస్థకు తెలిపారు. 36 చిన్నపార్టీలతో కూడిన ‘సామాజిక్‌ పరివర్తన్‌ మోర్చా’కు ఆయన పార్టీ నేతృత్వం వహిస్తోంది. ఆయన్ని ముఖ్యమంత్రి అభ్యర్థిగా మోర్చా ప్రకటించింది. ‘‘1971 ఎన్నికల్లో సిట్టింగ్‌ ముఖ్యమంత్రి టి.ఎన్‌.సింగ్‌ను గోరఖ్‌పుర్‌ ప్రజలు ఓడించారు. గత ఐదేళ్లలో యూపీని, గోరఖ్‌పుర్‌ని ఆదిత్యనాథ్‌ నాశనం చేశారు. అందువల్ల ఈ ఎన్నికల్లో ఆయన ఓడిపోవడం ఖాయం. విపక్ష ఓట్లు చీలిపోకుండా, సమాజ్‌వాదీ పార్టీతో కలిసి మేం పోటీ చేయాలనుకున్నాం. మాకు తగిన వాటా ఇవ్వడానికి వారు ఇష్టపడకపోవడంతో తిరస్కరించాం. ఎస్పీ పాలనతో విసుగెత్తిన ప్రజలు గతసారి భాజపాను గెలిపించారు. అదే తప్పును వారు మళ్లీ చేయరు’’ అని ఆజాద్‌ చెప్పారు. ఆయన గతంలో భీమ్‌ ఆర్మీని నెలకొల్పారు. దాని రాజకీయ విభాగంగా ఏఎస్‌పీ ఏర్పాటైంది.