హిజాబ్‌ ధరించిన బాలిక దేశ ప్రధాని అవుతుంది

అసదుద్దీన్‌ ఒవైసీ

లఖ్‌నవూ: కర్ణాటకలో ప్రారంభమై దేశవ్యాప్తంగా చర్చనీయాంశంగా మారిన హిజాబ్‌ వివాదంపై ఎంఐఎం అధినేత అసదుద్దీన్‌ ఒవైసీ ఘాటుగా స్పందించారు. ముస్లిం బాలికలు హిజాబ్‌ ధరించడాన్ని ఎవరు అడ్డుకుంటారో చూస్తామంటూ ఆదివారం ఉత్తర్‌ప్రదేశ్‌లో ఎన్నికల ప్రచారంలో పేర్కొన్నారు. ‘‘హిజాబ్‌ ధరించాలని బాలికలు నిర్ణయించుకుని, అందుకు వారి తల్లిదండ్రులు మద్దతు ఉంటే.. దీన్ని ఎవరు ఆపుతారో చూస్తాం. హిజాబ్‌, నిఖాబ్‌ ధరిస్తూనే మన బాలికలు డాక్టర్లు, కలెక్టర్లు, న్యాయమూర్తులు, వ్యాపారవేత్తలు అవుతారు. అందరూ గుర్తుంచుకోండి. బహుశా నేను చనిపోయాక, ఏదోక రోజున హిజాబ్‌ ధరించిన బాలిక ఈ దేశ ప్రధాని అవుతుంది.’’ అంటూ ప్రసంగించారు. ఈ వీడియోను ఆయన ట్విటర్‌లో పంచుకున్నారు.