మోదీ చేతుల్లో దేశం సురక్షితం: భాజపా

దిల్లీ: నరేంద్ర మోదీ పాలనలో దేశంలో నిరుద్యోగం ప్రబలడంతో పాటు ఆర్థిక, సామాజిక పరిస్థితులు క్షీణిస్తున్నాయంటూ ఉదయ్‌పుర్‌ చింతన శిబిరంలో కాంగ్రెస్‌ అధ్యక్షురాలు సోనియా గాంధీ చేసిన విమర్శలను భారతీయ జనతా పార్టీ తిప్పికొట్టింది. ప్రధాని మోదీ చేతుల్లో దేశం సురక్షితంగానే ఉందని, ఆందోళనచెందాల్సిన అవసరం లేదని పేర్కొంది. సోనియా గాంధీ.. ఆమె పార్టీ భవిష్యత్తు గురించి ఆత్మపరిశీలన చేసుకోవాలని భాజపా జాతీయ మీడియా ఇన్‌ఛార్జి, ప్రధాన అధికార ప్రతినిధి అనిల్‌ బలూని శుక్రవారం దిల్లీలో అన్నారు. మనుగడ కోసం పోరాటం చేస్తున్న కాంగ్రెస్‌ పార్టీ ప్రజలతో, క్షేత్రస్థాయి శ్రేణులతో సంబంధాలను కోల్పోయిందని తెలిపారు. దేశ భద్రత గురించి తగు నిర్ణయాలు తీసుకోగల సామర్థ్యం ప్రధాని మోదీకి ఉందన్నారు.