Gujarat polls: ప్రతి బూత్‌లోనూ భాజపానే గెలవాలి : గుజరాత్‌ ఓటర్లకు మోదీ పిలుపు

గాంధీనగర్‌: గుజరాత్‌లో అసెంబ్లీ ఎన్నికలకు సమయం దగ్గర పడుతోన్న వేళ ప్రధాన రాజకీయ పార్టీలు ప్రచారాన్ని ముమ్మరం చేశాయి. ఇందులో భాగంగా ప్రధాని మోదీ స్వరాష్ట్రంలో ఎన్నికల ప్రచారాన్ని విస్తృతం చేశారు. ఈ సందర్భంగా గిర్‌ సోమ్‌నాథ్‌ జిల్లాలో పర్యటించిన ఆయన.. ప్రతి పోలింగ్‌ బూత్‌లోనూ భాజపానే గెలిపించాలని ఓటర్లకు విజ్ఞప్తి చేశారు.

‘ప్రతి బూత్‌లోనూ భాజపా గెలవాలి. నా కోసం ఇది చేస్తారా..? ఈసారి అన్ని పోలింగ్‌ బూత్‌లలో గెలవడంపైనా దృష్టి పెట్టాను. ఈ విషయంలో మీరు సహకరిస్తే.. ఈ జిల్లాలోని నలుగురు భాజపా నేతలు అసెంబ్లీకి చేరతారు’ అని గిర్‌ సోమ్‌నాథ్‌లో ఏర్పాటు చేసిన ఎన్నికల ప్రచార సభలో నరేంద్ర మోదీ పిలుపునిచ్చారు. ప్రచారంలో భాగంగా గుజరాత్‌లో పర్యటిస్తోన్న ఆయన.. ఆదివారం ఉదయం అక్కడి ప్రముఖ సోమ్‌నాథ్‌ ఆలయాన్ని సందర్శించారు. అనంతరం సమీపంలోని వెరావల్‌లో ఏర్పాటు చేసిన బహిరంగ సభలో పాల్గొన్నారు. పోలింగ్‌ రోజున పెద్ద ఎత్తున ఓటర్లు తరలివచ్చి.. మునుపటి పోలింగ్‌ రికార్డులను తిరగరాయాలని సూచించారు.

ఇదిలాఉంటే, 182 అసెంబ్లీ స్థానాలున్న గుజరాత్‌లో రెండు విడతల్లో ఎన్నికలు జరగనున్నాయి. డిసెంబర్‌ 1న 89 స్థానాలకు, 5వ తేదీన 93 చోట్ల పోలింగ్‌ జరగనుంది. డిసెంబర్‌ 8న ఓట్ల లెక్కింపు చేపట్టి ఫలితాలు వెల్లడిస్తారు.