Hardik Patel: హిందువులంటే ఎందుకంత ద్వేషం.. కాంగ్రెస్‌పై మండిపడ్డ హార్దిక్‌ పటేల్‌

గాంధీనగర్‌: ఇటీవల కాంగ్రెస్‌ పార్టీని వీడిన గుజరాత్‌ పాటిదార్‌ నేత హార్దిక్‌ పటేల్‌ ఆ పార్టీపై విమర్శనాస్త్రాలు సంధిస్తున్నారు. ముఖ్యంగా హిందువులంటే కాంగ్రెస్‌ నాయకులకు ఎందుకంత ద్వేషం అంటూ తీవ్ర స్థాయిలో ధ్వజమెత్తారు. హిందువులు, అయోధ్య రాముడిపై గుజరాత్‌ కాంగ్రెస్‌ నాయకులు చేస్తోన్న వ్యాఖ్యలపై హార్దిక్‌ పటేల్‌ తీవ్రంగా మండిపడ్డారు.

‘ప్రజల మనోభావాలు దెబ్బతీసేలా కాంగ్రెస్‌ పార్టీ వ్యవహరిస్తోందని ఇదివరకే చెప్పాను. ముఖ్యంగా హిందువుల విశ్వాసాలను కించపరిచేలా ప్రయత్నాలు చేస్తూనే ఉంది. ఇప్పుడు రామమందిర ఇటుకల విషయంలోనూ కేంద్ర మాజీమంత్రి, గుజరాత్‌ కాంగ్రెస్‌ నేత అపవిత్రంగా మాట్లాడారు’ అని హార్దిక్‌ పటేల్‌ పేర్కొన్నారు. ‘రామమందిరం నిర్మాణానికి కాంగ్రెస్‌, ఆ పార్టీ నేతలు వ్యతిరేకమా..? అని ఈ సందర్భంగా అడగదలచుకున్నా. హిందువులంటే ఎందుకంత ద్వేషం..? ఎన్నో శతాబ్దాల తర్వాత అక్కడ ఆలయ నిర్మాణం జరుగుతుంటే వాటిపైనా కాంగ్రెస్‌ నేతలు అవమానపరుస్తూ వ్యాఖ్యలు చేస్తున్నారు’ అంటూ దుయ్యబట్టారు. అయోధ్య రామమందిరం నిర్మాణం జరుగుతోన్న వేళ అక్కడి ఇటుకలపై శునకాలు విసర్జిస్తున్నాయంటూ గుజరాత్‌ కాంగ్రెస్‌ పార్టీ మాజీ అధ్యక్షుడు చేసిన వ్యాఖ్యలపై హార్దిక్‌ పటేల్‌ ఈ విధంగా స్పందించారు.

ఇదిలాఉంటే, పాటిదార్‌ ఉద్యమంతో ప్రజాదరణ పొందిన హార్దిక్‌ పటేల్‌.. మూడేళ్ల క్రితం కాంగ్రెస్‌ పార్టీలో చేరి కొంతకాలం కీలక బాధ్యతల్లో కొనసాగారు. అయితే, గతకొంత కాలంగా పార్టీ తనను పట్టించుకోవడం లేదని అసంతృప్తి వ్యక్తం చేసిన ఆయన.. ఇటీవల పార్టీని వీడారు. అనంతరం భాజపా లేదా ఆమ్‌ఆద్మీలో చేరతారని భావిస్తున్నప్పటికీ.. ఏ పార్టీలో చేరే అంశంపై తాను ఇంకా నిర్ణయం తీసుకోలేదని ఇటీవలే స్పష్టం చేశారు. ఇలా పార్టీని వీడిన తర్వాత కాంగ్రెస్‌పై తీవ్ర స్థాయిలో విమర్శలు గుప్పిస్తోన్న హార్దిక్‌ పటేల్‌.. ఆయన మాదిరిగా కాంగ్రెస్‌లో ఎంతోమంది అసంతృప్తిలో ఉన్నారని పేర్కొన్నారు. ఇలా గుజరాత్‌లో మరికొన్ని నెలల్లో అసెంబ్లీ ఎన్నికలు జరుగనున్న వేళ తాజా పరిణామాలు కాంగ్రెస్‌ పార్టీకి ఇబ్బందికరంగా మారుతున్నాయని రాజకీయ విశ్లేషకులు పేర్కొంటున్నారు.