Munugode Bypoll: ఓటర్ల జాబితాపై హైకోర్టులో విచారణ.. నివేదిక సమర్పించాలని ఎస్‌ఈసీకి ఆదేశాలు

హైదరాబాద్: మునుగోడు ఉప ఎన్నిక ఓటర్ల జాబితాపై దాఖలైన పిటిషన్‌పై తెలంగాణ హైకోర్టు ఇవాళ విచారణ చేపట్టింది. పిటిషనర్‌ తరఫున న్యాయవాది రచనా రెడ్డి వాదనలు వినిపించారు. ‘‘ఉపఎన్నిక నేపథ్యంలో మునుగోడు నియోజకవర్గంలోని వివిధ మండలాల్లో భారీగా ఓటర్ల నమోదు ప్రక్రియ జరిగింది. నిబంధనలకు విరుద్ధంగా ఓటర్ల నమోదు చేపట్టారు. ఫార్మ్‌-6 ప్రకారం కొత్తగా దాదాపు 25వేల ఓట్లు నమోదయ్యాయి’’ అని కోర్టు దృష్టికి తీసుకెళ్లారు.

ఎన్నికల సంఘం తరపున అవినాష్‌ దేశాయ్ వాదనలు వినిపించారు. ‘‘తుది ఓటర్ల జాబితాను ఇంకా ఎన్నికల కమిషన్ ప్రకటించలేదు. ప్రతి సంవత్సరం కొత్త ఓటర్లు నమోదు చేసుకుంటారు. జనవరి 2021 వరకు 2.22 లక్షల ఓట్లు ఉన్నాయి. ప్రస్తుతం మునుగోడు నియోజకవర్గంలో 2.38 లక్షల ఓట్లు ఉన్నాయి. కొత్తగా నమోదైన 25వేల ఓట్లలో 7 వేలు తొలగించారు. ఓటర్ల నమోదు ప్రక్రియ పూర్తి పారదర్శకంగా జరిగింది’’ అని ఎన్నికల సంఘం తరపు న్యాయవాది కోర్టుకు వివరించారు. వాదనలు విన్న ధర్మాసనం.. మునుగోడు ఉపఎన్నిక సందర్భంగా నమోదైన ఓటర్ల జాబితా నివేదికను సమర్పించాలని రాష్ట్ర ఎన్నికల సంఘాన్ని (ఎస్‌ఈసీ) ఆదేశిస్తూ విచారణ రేపటికి వాయిదా వేసింది.