Election Result 2022:ఈ ఫలితాల నుంచి మేం నేర్చుకుంటాం..రాహుల్‌ ట్వీట్‌

ఇంటర్నెట్‌ డెస్క్‌: ఉత్తరప్రదేశ్‌ సహా ఐదు రాష్ట్రాల అసెంబ్లీ ఎన్నికల ఫలితాలు గురువారం వెలువడుతున్నాయి. యూపీలో మరోసారి భాజపా జయకేతనం ఎగురవేయగా.. పంజాబ్‌లో ఆమ్‌ ఆద్మీ పార్టీ ప్రభంజనం సృష్టించింది. ఇక, ఐదు రాష్ట్రాల ఎన్నికల్లో కాంగ్రెస్‌కు మరోసారి భంగపాటే ఎదురైంది. ఈ నేపథ్యంలో ఫలితాలపై కాంగ్రెస్‌ అగ్రనేత రాహుల్‌ గాంధీ ట్విటర్ ద్వారా స్పందించారు. ప్రజల తీర్పును అంగీకరిస్తున్నట్లు తెలిపారు. 

‘‘ప్రజల తీర్పును గౌరవంగా అంగీకరిస్తున్నాం. ఈ ఎన్నికల్లో విజయం సాధించిన ప్రతి ఒక్కరికీ అభినందనలు. ఈ ఎన్నికల కోసం పని చేసిన కాంగ్రెస్‌ కార్యకర్తలు, వాలంటీర్లకు కృతజ్ఞతలు. ఈ ఫలితాల నుంచి మేం నేర్చుకుంటాం. దేశ ప్రజల ప్రయోజనాలకు అనుగుణంగా పనిచేస్తాం’’ అని రాహుల్‌ ట్విటర్‌లో రాసుకొచ్చారు. 

తాజాగా వెలువడిన ఫలితాల ప్రకారం.. యూపీలో కాంగ్రెస్ మరోసారి సింగిల్‌ డిజిట్‌కే పరిమితమైంది. కేవలం 3 స్థానాలు మాత్రమే దక్కించుకోగలిగింది. ఇక ప్రస్తుతం అధికారంలో ఉన్న పంజాబ్‌లో ఘోర పరాభవం పొందింది. ఈ రాష్ట్రంలో కనీసం 20 స్థానాల్లోనూ గెలవలేకపోయింది. ఉత్తరాఖండ్‌లో 17 స్థానాలతో రెండో స్థానానికి పరిమితమైంది. గోవాలో 12 చోట్ల విజయం సాధించింది. మణిపూర్‌లో 2 స్థానాల్లో గెలిచి 9 చోట్ల ఆధిక్యంలో ఉంది.