UP Elections: రైళ్లకు లేని చలాన్లు.. బైకులకెందుకు?

లఖ్‌నవూ: ఉత్తరప్రదేశ్‌లో ఎన్నికలు సమీపించిన వేళ రాజకీయ పార్టీలు తమ మేనిఫెస్టోలను విడుదల చేస్తూ ప్రజలపై హామీల వర్షం కురిపిస్తున్నాయి. ఉచిత విద్యుత్‌ ఇస్తాం.. ల్యాప్‌టాప్‌లు పంపిణీ చేస్తామంటూ ఓటర్లను ఆకర్షించే ప్రయత్నం చేస్తున్నారు. తాజాగా సమాజ్‌వాది పార్టీతో పొత్తు పెట్టుకున్న సుహల్దేవ్‌ భారతీయ సమాజ్‌ పార్టీ(ఎస్బీఎస్పీ) అధినేత ఓం ప్రకాశ్‌ రాజ్‌భర్‌ కూడా ప్రజలకు ఓ హామీ ఇచ్చారు. తాము అధికారంలోకి వస్తే యూపీలో బైక్‌పై ట్రిపుల్‌ రైడ్‌కు అనుమతి ఇస్తామని చెప్పారు.

‘‘ఒక రైలు బోగిలో 70 సీట్లుంటే 300 మంది ప్రయాణిస్తున్నారు. ఆ రైళ్లకు ఎలాంటి చలాన్లు వేయరు. అలాంటప్పుడు ట్రిపుల్‌ రైడింగ్‌ చేస్తే బైకులకు ఎందుకు చలాన్లు వేస్తున్నారు? మా ప్రభుత్వం అధికారంలోకి రాగానే ట్రిపుల్‌ రైడింగ్‌కు అనుమతి ఇస్తాం. ఒకవేళ అనుమతి ఇవ్వలేని పరిస్థితి వస్తే.. జీపులకు, రైళ్లకు జరిమానాలు విధిస్తాం’’అని ఓం ప్రకాశ్‌ రాజ్‌భర్‌ తెలిపారు. అయితే, రాజ్‌భర్‌ హామీపై నెటిజన్ల నుంచి మిశ్రమ స్పందన లభిస్తోంది. ఆయన లేవనెత్తిన విషయం సహేతుకంగానే ఉందని కొందరు, ఇది వితండవాదమని మరికొందరు అంటున్నారు. 

యూపీలోని 403 నియోజకవర్గాల్లో ఏడు దశల్లో ఎన్నికలు జరగనున్నాయి. తొలిదశ ఎన్నికల పోలింగ్‌ ఫిబ్రవరి 10న జరగనుంది. పూర్తి ఫలితాలు మార్చి10న వెల్లడవుతాయి.