Telangana News: కాంగ్రెస్‌కు రాజీనామాపై జగ్గారెడ్డి ఏమన్నారంటే?

హైదరాబాద్‌: కాంగ్రెస్‌ పార్టీని వీడతారనే వార్తల నేపథ్యంలో సంగారెడ్డి ఎమ్మెల్యే జగ్గారెడ్డి స్పందించారు. ప్రస్తుతానికైతే కాంగ్రెస్‌ పార్టీని వీడనని ఆయన స్పష్టం చేశారు. రాజీనామా చేయొద్దని పార్టీ అధిష్ఠానం కోరిందని చెప్పారు. మరోవైపు పార్టీలో తనపై దుష్ప్రచారం చేస్తున్నారని తెలిపారు. ఈ మేరకు సోనియాగాంధీకి లేఖ రాస్తున్నట్లు చెప్పారు. తన మీద సోషల్‌ మీడియాలో పోస్టులు చేస్తున్నట్లు.. దీనిపై పీఎస్‌లో ఫిర్యాదు చేసినట్లు జగ్గారెడ్డి తెలిపారు. 

మరోవైపు ఈ ఉదయం కాంగ్రెస్ సీనియర్‌ నేత వీహెచ్‌, పీసీసీ ప్రధాన కార్యదర్శి బొల్లి కిషన్‌ జగ్గారెడ్డిని కలిశారు. ఈ సందర్భంగా కాంగ్రెస్‌ను వీడొద్దని.. పార్టీలోనే ఉంటూ కొట్లాడుదామని వీహెచ్‌ జగ్గారెడ్డికి చెప్పారు. కాంగ్రెస్‌కు దూరం కావొద్దని బొల్లి కిషన్‌ జగ్గారెడ్డి కాళ్లు పట్టుకొని కోరిన విషయం తెలిసిందే.