Kalvakuntla kavitha: మునుగోడు ప్రజలు అద్భుతమైన తీర్పు ఇచ్చారు: ఎమ్మెల్సీ కవిత

నిజామాబాద్‌: రాష్ట్రంలో ఎక్కడ ఎన్నికలు జరిగినా సీఎం కేసీఆర్‌ వెన్నంటే ప్రజలు ఉంటారనే విషయం మరోసారి రుజువైందని తెరాస ఎమ్మెల్సీ కల్వకుంట్ల కవిత అన్నారు. తెరాసపై విమర్శలు చేసే వారికి మునుగోడు ఉప ఎన్నికలో ప్రజలు ఇచ్చిన తీర్పు చెంపపెట్టు అని చెప్పారు. కార్తిక సోమవారాన్ని పురస్కరించుకుని నిజామాబాద్‌లోని నీలకంఠేశ్వర ఆలయంలో కవిత ప్రత్యేక పూజలు నిర్వహించారు. అనంతరం ఆమె మీడియాతో మాట్లాడారు.  

‘‘మునుగోడులో సీఎం కేసీఆర్‌ను ఆశీర్వదిస్తూ ప్రజలు అద్భుతమైన తీర్పు ఇచ్చారు. ఇన్ని రోజులూ అవాకులు, చవాకులు మాట్లాడిన అనేక మంది నోళ్లు మూతపడేలా చేశారు. నల్గొండ జిల్లాలో ఇప్పటికే హ్యాట్రిక్‌ కొట్టాం. ఇకపై తెలంగాణలో ఏ ఎన్నిక జరిగినా ప్రజలు తప్పకుండా కేసీఆర్‌ పక్షాన ఉంటారనే విశ్వాసం నాకుంది’’ అని కవిత ఆశాభావం వ్యక్తం చేశారు.