కమల్‌.. ఓ సూపర్‌ నోటా!

దిల్లీ: తమిళనాట ఎన్నికల ప్రచారం జోరందుకున్న నేపథ్యంలో కమల్‌ పార్టీ మీద వ్యంగ్యాస్త్రాలు సంధించారు కాంగ్రెస్‌ ఎంపీ కార్తి చిదంబరం. ఓట్ల కొట్లాటలో కమల్‌ ఒక సూపర్‌నోటాగా నిలుస్తారని అభిప్రాయపడ్డారు. లోకనాయకుడిగా ఉన్న కమల్‌కు ప్రజానాయకుడిగా ఆదరణ ఏమాత్రమూ దక్కదని, అసలు ఈ అసెంబ్లీ ఎన్నికల్లో ఆయన పార్టీకి ఒక్క సీటు కూడా రాదని అన్నారు. కమల్‌ పార్టీ ముందు ముందు కొనసాగడమే కష్టమన్నారు. అన్నాడీఎంకే-భాజపా కూటమి కూడా ఏమాత్రం ఆకట్టుకోదని కార్తి అన్నారు. భాజపా హిందీ- హిందుత్వ ఎజెండా తమిళ ప్రజల ముందు చెల్లబోదన్నారు. ఇక డీఎంకే- కాంగ్రెస్‌ కూటమికి తిరుగు లేదని, 200కు పైగా స్థానాల్లో విజయదుంధుభి మోగించడం ఖాయమని ధీమా వ్యక్తంచేశారు. మోదీ, ఇతర భాజపా నాయకుల ఆర్భాటపు ప్రచార పర్యటనలేవీ వాళ్లకు తమిళనాట విజయాన్ని అందించలేవని విమర్శలు గుప్పించారు. వాళ్ల ఎమ్మెల్యేలు, ఎంపీల సంఖ్య ఓ పెద్ద సున్నాగా ఉండిపోతుందని ఎద్దేవా చేశారు. దాదాసాహెబ్‌ ఫాల్కే అవార్డు అందుకున్న రజనీకాంత్‌కు అభినందనలు తెలుపుతూనే రాజకీయాలపై ఆ ప్రభావం ఏమీ ఉండబోదన్నారు. భాజపా గాలం వల్ల ప్రయోజనం శూన్యం అని తేల్చి చెప్పారు. ఏప్రిల్‌ 6న జరగనున్న తమిళనాడు అసెంబ్లీ ఎన్నికల్లో కాంగ్రెస్‌ 25 స్థానాల్లో పోటీ చేస్తోంది. మే 2న ఓట్ల లెక్కింపు జరగనుంది.