Agnipath Scheme: కాంగ్రెస్ హయాంలోనే ‘అగ్నిపథ్’కు బీజం: కిషన్‌ రెడ్డి

హైదరాబాద్‌: సైన్యంలో సంస్కరణల్లో భాగంగా తీసుకొచ్చిన ‘అగ్నిపథ్‌’ (Agnipath Scheme) పథకంపై అనవసరంగా రాజకీయం చేయొద్దని కేంద్ర మంత్రి కిషన్‌ రెడ్డి విజ్ఞప్తి చేశారు. ‘అగ్నిపథ్’తో దేశానికి మంచే తప్పా.. ఎవరికీ నష్టం జరగదని స్పష్టం చేశారు. కాంగ్రెస్ ప్రభుత్వ హయాంలోనే 1999లో ‘అగ్నిపథ్’కు బీజం పడిందని తెలిపారు. అగ్నివీరులుగా ఒక్కసారి పనిచేస్తే ఆత్మవిశ్వాసం ఏర్పడుతుందని, తద్వారా సైన్యం నుంచి బయటికి వచ్చాక బిజినెస్‌, ఉద్యోగాల్లోనూ మేటిగా రాణించవచ్చని పేర్కొన్నారు. ‘అగ్నిపథ్‌’కు వ్యతిరేకంగా దేశవ్యాప్తంగా ఆందోళనలు కొనసాగుతున్న నేపథ్యంలో కిషన్‌ రెడ్డి ఈ మేరకు మరోసారి స్పందించారు.

‘‘సైన్యంలో పనిచేయాలని చాలా మంది ఆశతో ఉన్నారు. అలాంటి వారు ‘అగ్నిపథ్‌’లో చేరవచ్చు. అగ్నివీరులుగా చేరి.. బయటకు వచ్చిన తర్వాత ఎందులో చేరడానికైనా ఆ నైపుణ్యాలు ఉపయోగపడతాయన్నారు. బయటికి వెళ్లాక అనేక విద్య, ఉద్యోగ అవకాశాలు ఉంటాయి. మహీంద్ర లాంటి కంపెనీలు సైతం అగ్నివీరులందరికీ ఉద్యోగాలు ఇచ్చేందుకు ముందుకొచ్చాయి. ప్రతిఒక్కరూ ‘అగ్నిపథ్‌’కు సహకరించాలి’’ అని కిషన్‌ రెడ్డి విజ్ఞప్తి చేశారు.