Kishan Reddy: తప్పుడు ప్రచారాన్ని తిప్పికొట్టడంలో దూకుడు పెంచాలి: కిషన్‌రెడ్డి

హైదరాబాద్‌: ప్రపంచంలో అతిపెద్ద  సభ్యత్వం కలిగిన పార్టీ భాజపా అని కేంద్ర మంత్రి కిషన్‌రెడ్డి అన్నారు. చిన్నచిన్న భేదాభిప్రాయాలు ఉన్నప్పటికీ అందరం కలిసి పనిచేయాలని పార్టీ శ్రేణులకు సూచించారు. శామీర్‌పేటలో 3 రోజుల పాటు జరగనున్న భాజపా శిక్షణ తరగతులకు ఆయన హాజరై మాట్లాడారు. 

‘‘భాజపాపై కొందరు కావాలనే తప్పుడు ప్రచారం చేస్తున్నారు. అధికారంలో ఉన్న పార్టీ విపక్ష పార్టీపై విమర్శలు చేస్తోంది. రాష్ట్రంలో చేసిన పనులు చెప్పుకోలేక తెరాస తప్పుడు ప్రచారం చేస్తోంది. సంక్షేమ పథకాలు అపుతామని బెదిరించి మునుగోడులో తెరాస గెలిచింది. తప్పుడు ప్రచారాన్ని తిప్పికొట్టడంలో పార్టీ శ్రేణులంతా దూకుడుగా ఉండాలి. ఎట్టి పరిస్థితుల్లో వచ్చే ఎన్నికల్లో రాష్ట్రంలో పార్టీ అధికారంలోకి రావాలి’’ అని కిషన్‌రెడ్డి అన్నారు. పార్టీ రాష్ట్ర అధ్యక్షుడు బండి సంజయ్‌,  రాష్ట్ర ఇన్‌ఛార్జి తరుణ్‌ ఛుగ్‌, పార్టీ ఎమ్మెల్యేలు, కార్యదర్శులు హాజరయ్యారు.