Andhra News: హరికృష్ణను ఓడించింది కొడాలి నానియే: రావి

గుడివాడ, న్యూస్‌టుడే: గుడివాడలో నందమూరి హరికృష్ణను చిత్తుగా ఓడించింది కొడాలి నాని కాదా అని తెదేపా నియోజకవర్గ బాధ్యుడు రావి వెంకటేశ్వరరావు ప్రశ్నించారు. కృష్ణాజిల్లా గుడివాడలోని తెదేపా కార్యాలయంలో శుక్రవారం ఆయన మీడియాతో మాట్లాడారు. నాని మీదున్న నమ్మకంతో హరికృష్ణ గంట గుర్తుపై గుడివాడలో పోటీ చేస్తే, ఓడించిన ఘనత నానికే దక్కుతుందన్నారు. తన నియోజకవర్గంలో హరికృష్ణ పోటీ చేయడాన్ని జీర్ణించుకోలేని కొడాలి తన కార్యకర్తలతో హరికృష్ణను ఓడించినట్లు ఆయన వ్యాఖ్యానించారు. అలాంటి వెన్నుపోటు మనస్తత్వం ఉన్న ఆయన.. ఇప్పుడు నీతి కబుర్లు చెప్పడం సిగ్గుచేటన్నారు. కోవర్టు రాజకీయాలు చేసే ఆయనకు గుడివాడ ప్రజలు బుద్ధి చెప్పే రోజులు దగ్గరపడ్డాయన్నారు. ఆయన చేసే తప్పులన్నిటికీ సమాధానం చెప్పాల్సిన రోజు వస్తుందని, ఆ రోజు తప్పక జైలుకి వెళ్లాల్సి ఉంటుందని పేర్కొన్నారు.