Telangana news: అవినీతిని ప్రశ్నిస్తే.. నన్ను కాంట్రాక్టర్‌ అంటున్నారు: కోమటిరెడ్డి

హైదరాబాద్‌: రాష్ట్ర ప్రభుత్వ అవినీతిని ప్రశ్నిస్తే అధికార పార్టీ నేతలు జీర్ణించుకోలేకపోతున్నారని కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి మండిపడ్డారు. రాజకీయంగా తలపడలేక తనపై వ్యక్తిగత దూషణలకు దిగుతున్నారని అగ్రహం వ్యక్తం చేశారు. అసెంబ్లీ మీడియా పాయింట్ వద్ద రాజగోపాల్‌ రెడ్డి మాట్లాడుతూ.. ‘‘అసెంబ్లీలో ప్రతిపక్షాలను మాట్లాడనివ్వడంలేదు. అవినీతిపై ప్రశ్నిస్తుంటే.. కాంట్రాక్టర్‌ అంటున్నారు. కాంట్రాక్టర్‌గా ఉండటం తప్పా..అది తప్పుడు వ్యాపారమా?కాంట్రాక్టులు అడ్డుకున్నా.. అధికార పార్టీకి లొంగలేదు. లేవనెత్తిన ప్రశ్నలకు సమాధానం చెప్పలేక వ్యక్తిగత దూషణలు చేస్తున్నారు. కాంట్రాక్టర్లకు రూ.లక్షల కోట్లు ఇచ్చి కమీషన్లు దోచుకుంటున్నారు. సింగరేణిలో 20వేల కోట్ల అవినీతి జరిగింది. అధికారాన్ని అడ్డుపెట్టుకొని అవినీతికి పాల్పడుతున్నారు. ప్రజలే ఆలోచించి కుటుంబ పాలనను అంతమొందించాలి’ అని విజ్ఞప్తిచేశారు.