Munugode bypoll results: కమ్యూనిస్టుల మద్దతుతోనే మునుగోడులో తెరాస విజయం: కూనంనేని

హైదరాబాద్‌: మునుగోడు ఉప ఎన్నికలో భాజపా ఓటమి ఒక్క రాజగోపాల్‌రెడ్డికే కాదు, నరేంద్రమోదీకి చెంపపెట్టు లాంటి తీర్పు అని సీపీఐ తెలంగాణ రాష్ట్ర కార్యదర్శి కూనంనేని సాంబశివరావు అన్నారు. హైదరాబాద్‌లోని ముగ్దూం భవన్‌ వద్ద ఆయన మీడియాతో మాట్లాడారు. ‘‘ఎమ్మెల్యే పదవికి రాజీనామా చేస్తే.. డబ్బులు ఉన్నాయి, భాజపా అండ ఉంది కాబట్టి గెలవొచ్చని భావించారు. కానీ, ఇవాళ మా నైతిక విజయమని రాజగోపాల్‌రెడ్డి చెబుతున్నారు. మునుగోడులో భాజపా ఓటమి, తెరాస గెలుపు.. ప్రజాస్వామ్యానికి లభించిన విజయంగా మేం భావిస్తున్నాం. మునుగోడు ఫలితం భాజపా వ్యతిరేక శక్తులన్నింటినీ ఒక తాటిపైకి తీసుకురావడానికి దోహద పడుతుంది.

వామపక్ష శక్తులన్నీ ఏకం కావాల్సిన ఆవశ్యకత మునుగోడు ఉప ఎన్నిక ద్వారా మరోసారి స్పష్టమైంది. తెలంగాణలో పాగా వేయాలని, ఎమ్మెల్యేలను కొనుగోలు చేయాలని భాజపా చూస్తోంది. గతంలో గెలిచిన ఎంపీ, ఎమ్మెల్యే స్థానాలు కూడా ఈసారి ఆ పార్టీ గెలవలేదు. మునుగోడులో కాంగ్రెస్‌కు పెద్ద తలకాయ లేకపోవడంతో తప్పనిసరి పరిస్థితుల్లో ఆ పార్టీ కార్యకర్తలకు రాజగోపాల్‌రెడ్డికే ఓటు వేశారు. కానీ, వచ్చే అసెంబ్లీ ఎన్నికల్లో ఆ పరిస్థితి ఉండదు. భవిష్యత్‌లో తెరాస, కాంగ్రెస్‌ మధ్యే పోటీ ఉండే అవకాశముంది. భాజపాను ఓడించే శక్తితో కలిసి పనిచేసేందుకు వామపక్షాలు సిద్ధంగా ఉన్నాయి. ఎట్టి పరిస్థితుల్లో భాజపాను తెలంగాణలో అడుగుపెట్టనివ్వకుండా చేస్తాం. కమ్యూనిస్టుల మద్దతుతోనే మునుగోడులో తెరాస గెలిచింది. భాజపాను ఓడించేందుకు అందరం కలవాల్సిన అవసరముంది’’ అని కూనంనేని సాంబశివరావు అన్నారు.