fuel hike: పెట్రోల్‌ కన్నా లిక్కరే చౌక!

మహరాష్ట్ర మాజీ సీఎం విమర్శలు

నాందేడ్‌: దేశంలో ఇంధన ధరలు పెరగడంపై కాంగ్రెస్‌ నేత, మహారాష్ట్ర మంత్రి అశోక్‌ చవాన్‌ వ్యంగ్యాస్త్రాలు సంధించారు. భాజపా హయాంలో పెట్రోల్‌, డీజిల్‌ ధరల కన్నా మద్యం ధరే చౌకగా మారిందన్నారు. ఇంధన ధరల పెరుగుదలపై నాందేడ్‌లోని కలెక్టరేట్‌ వద్ద చేపట్టిన నిరసన ర్యాలీలో ఆయన పాల్గొన్నారు. ఈ సందర్భంగా చవాన్‌ మాట్లాడుతూ.. గతంలో కాంగ్రెస్‌ హయాంలో రూపాయి లేదా రెండు రూపాయలు పెంచితే విపక్షాలు నిరసనలకు దిగేవన్నారు. ఈ రోజు భాజపా అధికారంలోకి వచ్చాక లీటరు పెట్రోల్‌ రూ.100 దాటేసిందని, ఎల్పీజీ సిలిండర్‌ ధర మూడు రెట్లు పెరిగిందని మండిపడ్డారు. ఆ పెరుగుదలతో నిత్యావసర వస్తువులతో పాటు రవాణా ఖర్చులు సైతం పెరిగిపోతున్నాయన్నారు.