కేసీఆర్‌ జీ.. మీరు గొప్పగా పోరాడుతున్నారు: తెలంగాణ సీఎంకు ఉద్ధవ్‌ ఠాక్రే ఫోన్‌

హైదరాబాద్‌: మహారాష్ట్ర సీఎం ఉద్ధవ్‌ ఠాక్రేతో తెలంగాణ సీఎం కేసీఆర్‌ భేటీ కానున్నారు. భాజపా అనుసరిస్తున్న ప్రజా వ్యతిరేక విధానాలను ఎండగడుతూ దేశం కోసం కేసీఆర్‌ చేస్తున్న పోరాటానికి ఉద్ధవ్‌ సంపూర్ణ మద్దతు తెలిపారు. ఈ మేరకు కేసీఆర్‌కు ఆయన ఫోన్‌ చేశారు. ముంబయి రావాలని.. తమ ఆతిథ్యాన్ని స్వీకరించాలని ఆహ్వానించారు. 

‘‘కేసీఆర్‌ జీ మీరు చాలా గొప్పగా పోరాడుతున్నారు. మీది న్యాయమైన పోరాటం. ఈ దేశాన్ని విభజన శక్తుల నుండి కాపాడుకోవడానికి సరైన సమయంలో మీరు గళం విప్పారు. రాష్ట్రాల హక్కుల కోసం, దేశ సమగ్రతను కాపాడేందుకు మీరు పోరాటం కొనసాగించండి. ఇదే స్ఫూర్తితో ముందుకు సాగండి. మా మద్దతు మీకు సంపూర్ణంగా ఉంటుంది. ఈ దిశగా దేశ ప్రజలందరినీ కూడగట్టేందుకు మా వంతు సహకారాన్ని అందిస్తాం" అని కేసీఆర్‌తో ఉద్ధవ్‌ ఠాక్రే అన్నారు. మహారాష్ట్ర సీఎం ఆహ్వానం నేపథ్యంలో ఈనెల 20న కేసీఆర్‌ ముంబయి వెళ్లనున్నారు. దేశంలో తాజా రాజకీయ పరిస్థితులు, భవిష్యత్‌లో ఎలా కలిసి ముందుకెళ్లాలనే అంశాలపై వీరిద్దరూ ఆ భేటీలో చర్చించే అవకాశముంది.