Congress: ఖర్గే సమక్షంలో కాంగ్రెస్‌లో చేరిన మైనంపల్లి, వేముల వీరేశం

దిల్లీ: పలువురు భారాస నేతలు గురువారం కాంగ్రెస్‌ గూటికి చేరారు. మల్కాజిగిరి భారాస ఎమ్మెల్యే మైనంపల్లి హన్మంతరావు, ఆయన తనయుడు రోహిత్‌, మాజీ ఎమ్మెల్యే వేముల వీరేశం, కుంభం అనిల్‌ కుమార్‌ దిల్లీలో ఏఐసీసీ అధ్యక్షుడు మల్లికార్జున ఖర్గే సమక్షంలో కాంగ్రెస్‌ పార్టీలో చేరారు. వీరికి ఖర్గే కాంగ్రెస్‌ కండువా కప్పి పార్టీలోకి ఆహ్వానించారు. న్యూదిల్లీలోని ఖర్గే నివాసంలో జరిగిన ఈ కార్యక్రమంలో టీపీసీసీ అధ్యక్షుడు రేవంత్‌రెడ్డి, ఏఐసీసీ తెలంగాణ వ్యవహారాల ఇన్‌ఛార్జి మాణిక్‌రావు ఠాక్రే తదితరులు పాల్గొన్నారు.

కాంగ్రెస్‌ పార్టీలో చేరిన అనంతరం మైనంపల్లి మాట్లాడుతూ.. తెలంగాణలో కాంగ్రెస్‌ ప్రభుత్వం ఏర్పడుతుందని ధీమా వ్యక్తం చేశారు. రాష్ట్రంలో కాంగ్రెస్‌కు అనుకూలమైన వాతావరణం ఉందన్నారు. సర్వేల ఆధారంగా అధిష్ఠానమే సీట్లను నిర్ణయిస్తుందని చెప్పారు. భారాసలో ఎంత చేయాలో తను అంతా చేశారని.. కార్యకర్తలంతా తనతోనే ఉన్నారని వెల్లడించారు.