Andhra News: నా దగ్గర పత్రికను బట్టి సమాధానం ఉంటుంది.. విలేకరిపై రుసరుసలాడిన అంబటి

విజయవాడ: పోలవరం ప్రాజెక్టుపై నిర్వహించిన మీడియా సమావేశంలో ఏపీ జలవనరుల శాఖ మంత్రి అంబటి రాంబాబు చిందులు తొక్కారు. పోలవరం ప్రాజెక్టుపై పలు కీలక  ప్రశ్నలు అడగడంతో సమాధానం ఇవ్వకుండా ఆగ్రహం వ్యక్తం చేశారు. పోలవరం ప్రాజెక్టులో గతంలో చేసిన పనుల్లో లోపాల వల్లే డయాఫ్రంవాల్ కొట్టుకుపోయిందని మంత్రి చెప్పారు. గత ప్రభుత్వంలో నిర్మించిన పనులకు పీపీఏ, సీడబ్ల్యూసీ అనుమతి ఉందా.. లేదా అని మీడియా ప్రతినిధులు సూటి ప్రశ్న వేశారు. ప్రాజెక్టుకు పీపీఏ, సీడబ్ల్యూసీ అనుమతిపై తొలుత దాటవేత ధోరణిలో మంత్రి సమాధానం ఇచ్చారు.

అనుమతి ఉందా లేదా అనే విషయమై సూటిగా సమాధానం చెప్పాలని ప్రశ్నించిన ఈనాడు విలేకరిపై నోరు పారేసుకున్నారు. పత్రికను బట్టి సమాధానం ఉంటుందని గద్దించారు. ప్రెస్‌మీట్‌ పెట్టిన అంశంపై నిజాయతీగా అధ్యయనం చేయకుండా, విషయం లోతులు తెలుసుకోకుండా అడిగిన ప్రశ్నకు జవాబు చెప్పలేక నీటిపారుదల మంత్రి నీళ్లు నమిలారు. విషయాన్ని కప్పిపుచ్చుకునేందుకు పళ్లు కొరుకుతూ విపరీత హావభావాలు ప్రదర్శిస్తూ వ్యంగం, వెటకారం కలగలిపి విలేకరిపై ఎదురుదాడికి దిగారు. ‘‘పీపీఏ, సీడబ్ల్యూసీ, కేంద్ర ప్రభుత్వాన్ని తిట్టించాలనుకుంటున్నారా? మీరు తిట్టించాలని ప్రయత్నించినా నేను వారిని తిట్టను. వాదన వద్దు.. విను.. నా వద్ద పత్రికను బట్టి సమాధానం ఉంటుంది. నేను చెప్పేది చెబుతాను. మీకు ఇష్టమొచ్చింది రాసుకోండి’’ అని అంబటి తేల్చి చెప్పారు.