Minister KTR: భాజపాకు ఆర్థికం కంటే రాజకీయమే ప్రాధాన్యమైంది: కేటీఆర్‌

హైదరాబాద్‌: కేంద్ర ప్రభుత్వం అనుసరిస్తున్న విధానాలతో దేశ యువత చాలా నష్టపోతోందని తెలంగాణ ఐటీ, పరిశ్రమల శాఖ మంత్రి కేటీఆర్ అన్నారు. చైనా నుంచి బయటకు వస్తున్న వ్యాపారవేత్తలను ఆకర్షించడంలో కేంద్రంలోని భాజపా ప్రభుత్వం విఫలమైందని ఆయన విమర్శించారు. ఈ మేరకు పార్లమెంటరీ ప్యానెల్ నివేదికపై ట్విటర్‌ వేదికగా కేటీఆర్‌ స్పందించారు. ఎన్‌పీఏ ప్రభుత్వానికి దేశ ఆర్థికం కంటే రాజకీయమే ప్రాధాన్యమైందని పేర్కొన్నారు. రాజకీయానికి ప్రాధాన్యమిస్తే ఫలితాలు ఇలాగే ఉంటాయని ఎద్దేవా చేశారు. టెలిప్రాంప్టర్ చూసి ప్రసంగించడం సులువే.. కానీ, పటిష్ఠ ప్రయత్నాలు లేకపోతే ఫలితాలు రావడం కష్టమని తెలిపారు. ఈ తరహా పరిస్థితులు దేశ యువతకు చాలా నష్టం కలిగిస్తాయని కేటీఆర్‌ ట్వీట్‌లో పేర్కొన్నారు.