Ts Assembly: సమావేశాలు పొడిగించాలని కాంగ్రెస్ నేతలు అడగలేదు: ప్రశాంత్‌రెడ్డి

హైదరాబాద్: బడ్జెట్ సమావేశాల్లో 103 మంది సభ్యులున్న తమ పార్టీ కంటే 13 మంది సభ్యులున్న మజ్లిస్, కాంగ్రెస్ పార్టీల సభ్యులకే ఎక్కువగా అవకాశం ఇచ్చామని శాసనసభా వ్యవహారాల శాఖ మంత్రి వేముల ప్రశాంత్ రెడ్డి తెలిపారు. బడ్జెట్ సమావేశాలు అర్థవంతంగా సాగాయని.. తక్కువ రోజుల్లో ఎక్కువ సమయం సభ జరిగినట్లు చెప్పారు. సగటున 8 గంటలు, ఒక్కోరోజు 12 గంటల పాటు అసెంబ్లీ సాగిందని వివరించారు. ముఖ్యమంత్రి కేసీఆర్ కంటే ప్రతిపక్ష ఫ్లోర్ లీడర్లు ఎక్కువ సమయం తీసుకున్నారని వెల్లడించారు.

‘‘కీలకమైన ఉద్యోగ నియామకాల ప్రకటనతో పాటు వివిధ వర్గాలకు పనికొచ్చేలా సీఎం కేసీఆర్ నిర్ణయాలు ప్రకటించారు. అయితే, ప్రభుత్వం చేసిన అభివృద్ధి, సంక్షేమ కార్యక్రమాలు తమ పోరాట ఫలితమని చెప్పుకునే దీనస్థితిలో కాంగ్రెస్ పార్టీ ఉంది. ప్రజాసమస్యలపై మాట్లాడలేక కేంద్ర వైఖరి, భాజపాని ఎండగడతామని తెలిసే ఆ పార్టీ సభ్యులు సస్పెన్షన్‌కు గురయ్యేలా వ్యవహరించారు. సమావేశాలు పొడిగించాలని కాంగ్రెస్ నేతలు అడగలేదు. సభ నడుస్తున్న సమయంలో కాంగ్రెస్ నుంచి మొక్కుబడిగా ఒక్క సభ్యుడు మాత్రమే సభలో ఉండేవారు. ఒక్క వాకౌట్, నిరసన లేకుండా సమావేశాలు జరిగినందుకు అన్ని పార్టీలకు కృతజ్ఞతలు’’ అని ప్రశాంత్‌రెడ్డి పేర్కొన్నారు.