Andhra news: పవన్‌ కల్యాణ్‌ ‘అన్‌స్టాపబుల్‌’ షోకు వెళ్లడం ఓ వింత: మంత్రి రోజా

తిరుపతి: తెదేపా జాతీయ ప్రధాన కార్యదర్శి నారా లోకేశ్‌, జనసేన అధినేత పవన్‌ కల్యాణ్‌పై వైకాపా మంత్రి రోజా విమర్శలు గుప్పించారు. లోకేశ్‌ పాదయాత్ర.. యువగళం కాదు నారా గళమని ఎద్దేవా చేశారు. తిరుపతిలో క్రీడలు, నృత్యంపై బుధవారం నిర్వహించిన జాతీయస్థాయి పోటీల్లో ఆమె ఈ వ్యాఖ్యలు చేశారు. పవన్‌ కల్యాణ్‌ కూడా తెదేపా అధినేత చంద్రబాబు మార్గంలోనే పయనిస్తున్నారని విమర్శించారు. ఇప్పటివరకూ ఏ షోలకు వెళ్లని పవన్‌ అన్‌స్టాపబుల్‌ షోకు వెళ్లడం వింతగా ఉందన్నారు. జనసేన నాయకులు తమ అధినేత తీరును గుర్తించాలని సూచించారు. ఆ పార్టీ నాయకులపై వైకాపాకు సానుభూతి ఉందని మంత్రి రోజా తెలిపారు.