Andhra News: విధ్వంసాలు సృష్టిస్తే మాత్రం సహించేది లేదు: మంత్రి రోజా

అమరావతి: కోనసీమ జిల్లాకు అంబేడ్కర్‌ పేరు విషయంలో ప్రతిపక్షాల తీరును రాష్ట్ర మంత్రి రోజా తప్పుబట్టారు. కోనసీమకు అంబేడ్కర్‌ పేరు పెట్టే విషయంలో ప్రతిపక్షాలు ద్వంద్వ వైఖరితో వ్యవహరిస్తున్నాయని విమర్శించారు. కోనసీమ జిల్లాకు అంబేడ్కర్‌ పేరు పెట్టాలని గతంలో ప్రతిపక్షాలు నిరాహార దీక్షలు చేసినట్లు గుర్తు చేశారు. ప్రజలు సైతం అంబేడ్కర్‌ పేరు పెట్టాలని కోరినట్లు చెప్పారు. అందరూ కోరిన మేరకే సీఎం జగన్‌ కోనసీమ జిల్లాకు అంబేడ్కర్‌ పేరు పెట్టారని పేర్కొన్నారు. అధికారంలోకి వస్తే అంబేడ్కర్‌ పేరు పెడతానని తెదేపా అధినేత చంద్రబాబు గతంలో అన్నారని రోజా వెల్లడించారు. ఇప్పుడు పేరు పెట్టిన తర్వాత తాను ఒక రకంగా మాట్లాడుతూ.. కింది స్థాయి కేడర్‌తో మరో మాట మాట్లాడిస్తున్నారని ఆగ్రహం వ్యక్తం చేశారు. అల్లర్లు చేయడం సరైన విధానం కాదని.. విధ్వంసాలు సృష్టిస్తే మాత్రం సహించేది లేదని రోజా హెచ్చరించారు.