MLC Kavitha: జాతీయవాదం ముసుగులో దాక్కుంటున్న ప్రధాని మోదీ: ఎమ్మెల్సీ కవిత

హైదరాబాద్‌: పార్లమెంటులో ప్రధాని మోదీ (PM Modi) తన ప్రసంగంలో ‘అదానీ’ (Adani) అంశంపై జవాబు చెప్పలేదని భారాస ఎమ్మెల్సీ కల్వకుంట్ల కవిత (MLC kavitha) అన్నారు. జాతీయవాదం ముసుగులో ప్రధాని దాక్కుంటున్నారని విమర్శించారు. ఈ మేరకు హైదరాబాద్‌లో ఏర్పాటు చేసిన  మీడియా సమావేశంలో ఆమె మాట్లాడారు. ‘‘రైతులకు ప్రభుత్వం అందించే సాయంపై పార్లమెంటులోనే ప్రధాని మోదీ అబద్ధాలు చెప్పారు. 11కోట్ల మంది రైతులకు నగదు సాయం చేస్తున్నామన్నారు. కానీ, కేంద్రం 3.87 కోట్ల మంది రైతులకే సాయం అందిస్తోంది. ఏటా నగదు సాయం లబ్ధి పొందే రైతుల సంఖ్య తగ్గిస్తున్నారు’’ అని కవిత ఆరోపించారు. అదానీ సంస్థల్లో ప్రజల సంస్థ ఎల్‌ఐసీ పెట్టుబడులు పెట్టిందన్న కవిత.. అదానీ వ్యవహారంపై జాయింట్‌ పార్లమెంటరీ కమిటీ (జేపీసీ) వేయాలని భారాస డిమాండ్‌ చేస్తోందని స్పష్టం చేశారు.