రైతు శ్రేయస్సుకు కట్టుబడి ఉన్నాం: మోదీ

కోయంబత్తూరు: రైతు సంక్షేమానికి తమ ప్రభుత్వం కట్టుబడి ఉందని ప్రధాని నరేంద్రమోదీ అన్నారు. వ్యవసాయరంగంలో మధ్యవర్తులపై ఆధారపడకుండా రైతుల గౌరవాన్ని కాపాడుతూ వారి శ్రేయస్సుకు పాటుపడుతున్నామని చెప్పారు. వ్యవసాయ రంగానికి ఓ రూపు తీసుకురావాలన్నదే ఎన్డీయే ప్రభుత్వ ధ్యేయమని వివరించారు. తమిళనాడులోని కోయంబత్తూరులో నిర్వహించిన బహిరంగ సభలో ఆయన మాట్లాడారు. అంతకుముందు పలు అభివృద్ధి పనులను ప్రారంభించారు.

చిన్నసన్నకారు రైతుల కోసం పనిచేయడాన్ని తాము గౌరవంగా భావిస్తున్నామని ప్రధాని మోదీ అన్నారు. ఏడేళ్లుగా వారి కోసం పనిచేస్తున్నామని చెప్పారు. భూసార పరీక్షల కార్డులు, ఇతర కార్యక్రమాల ద్వారా వ్యవసాయ రంగంలో విప్లవాత్మక మార్పులు తలపెట్టామన్నారు. డీఎంకే- కాంగ్రెస్‌ నేతలు ఒక్క చోట కూర్చుని రాష్ట్రాన్ని ఎలా దోచుకోవాలా? అని ఆలోచన చేస్తున్నారని దుయ్యబట్టారు. గత ప్రభుత్వం అవినీతితో పరిపాలన అందిస్తే.. ప్రస్తుత ఎన్డీయే ప్రభుత్వం కరుణతో కూడిన పాలన అందిస్తోందని అన్నారు. త్వరలో జరగబోయే తమిళనాడు అసెంబ్లీ ఎన్నికల్లో అన్నాడీఎంకే-భాజపా ఒక కూటమిగా డీఎంకే- కాంగ్రెస్‌ మనో కూటమిగా పోటీ చేయనున్న సంగతి తెలిసిందే.