Nara Lokesh: ఆ మానవ మృగాలకు శిక్ష పడుంటే భయం పుట్టేది: లోకేశ్‌

అమరావతి: గుంటూరు జిల్లా దుగ్గిరాల మండలం తుమ్మపూడిలో మహిళపై హత్యాచారం దారుణమని తెదేపా జాతీయ ప్రధాన కార్యదర్శి నారా లోకేశ్‌ ధ్వజమెత్తారు. ఈ ఘటనలో నిందితులను కఠినంగా శిక్షించాలని డిమాండ్‌ చేశారు. సీఎం జగన్‌ పాలనలో మహిళలు బయటకి రావాలంటేనే భయపడుతున్నారని ఆరోపించారు. దాడికి గురైన ఒక యువతికి న్యాయం చేయాలని పోరాడుతుండగానే ఇంకో మహిళపై అఘాయిత్యం జరిగిందని ఆగ్రహం వ్యక్తం చేశారు.

నిందితులపై కఠిన చర్యలు తీసుకోవాల్సిన ప్రభుత్వం బాధిత కుటుంబాలకి మద్దతుగా నిలిచేవారికి నోటీసులు ఇవ్వడం, కేసులు నమోదు చేయడం తాలిబన్ల పాలనని తలపిస్తోందన్నారు. అత్యాచారాలు, హత్యలతో బరితెగించిన నిందితులను ప్రభుత్వం చూసీచూడనట్లు వదిలేస్తోందని లోకేశ్‌ మండిపడ్డారు. అందువల్లే నేరగాళ్లు చెలరేగిపోతున్నారని ఆక్షేపించారు. వైకాపా పాలనలో ఇప్పటి వరకు 800 మందికి పైగా మహిళలపై అఘాయిత్యాలు జరిగాయన్నారు. వీటికి పాల్పడిన మానవ మృగాళ్లలో ఒక్కరికైనా శిక్ష పడి ఉంటే వారికి భయం పుట్టేదని లోకేశ్ ఓ ప్రకటనలో అన్నారు.