Gujarat: గుజరాత్‌లో ప్రమాణస్వీకార కార్యక్రమానికి ప్రధాని మోదీ

ఇంటర్నెట్‌డెస్క్‌: గుజరాత్‌(Gujarat)లో భాజపా(BJP) ప్రభుత్వం ఏర్పాటు చేయడం ఖాయమైంది. ఇప్పటి వరకు 111 స్థానాల్లో భాజపా (BJP) విజయం సాధించింది. అధికారం చేపట్టడానికి అవసరమైన  92 స్థానాల మార్కును భాజపా(BJP) దాటేసింది. దీంతో గుజరాత్‌ ముఖ్యమంత్రిగా భూపేంద్ర పటేల్‌ (Bhupendra Patel)రెండోసారి ప్రమాణస్వీకారం చేయనున్నారు. డిసెంబర్‌ 12వ తేదీన ఈ కార్యక్రమం జరగనుంది. దీనికి ప్రధాని నరేంద్ర మోదీ(Modi), హోంశాఖ మంత్రి అమిత్‌షా హాజరుకానున్నారు.  ఈ ఎన్నికల్లో కాంగ్రెస్‌ దాదాపు 50కిపైగా సీట్లను కోల్పోగా.. ఆ మేరకు భాజపా లబ్ధిపొందింది.

 ఈ విజయంపై భాజపా రాష్ట్ర అధ్యక్షుడు సీఆర్‌ పాటిల్‌ మాట్లాడుతూ ‘‘ప్రధాని మోదీ, హోం మంత్రి అమిత్‌షా అద్భుత ప్రచారానికి లభించిన ప్రత్యక్ష నిదర్శనం. ఇది అద్భుత విజయం. కొందరు మార్పు(పరివర్తన్‌)గురించి మాట్లాడారు. కొంత మంది గుజరాత్‌లో తామే గెలుస్తామని చెప్పారు. ఈ రోజు వారి సవాళ్లకు జవాబు లభించింది’’ అని అన్నారు.  పాటీదార్‌ సామాజిక వర్గానికి చెందిన నేత హార్దిక్‌ పటేల్‌ కూడా ఈ ఎన్నికల్లో విజయం సాధించారు. ఆయన మాట్లాడుతూ ‘‘ఇది భాజపా పనితీరుకు, ఆర్టికల్‌ 370 తొలగింపునకు లభించిన విజయం. రానున్న 20 ఏళ్లలో మేం చేయాల్సిన పనిపై దృష్టిపెడతాము. ఆమ్‌ ఆద్మీ పార్టీతో అసలు పోటీనే లేదు’’ అని వ్యాఖ్యానించారు.