Ljp: ఆయన్ను కేంద్రమంత్రిని చేస్తే..కోర్టుకు వెళ్తాం

చిరాగ్ పాసవాన్ ఆగ్రహం

దిల్లీ: ఎల్జేపీ చీలిక వర్గం నేత పశుపతి పరాస్‌కు కేంద్ర మంత్రివర్గంలో చోటు దక్కుతుందనే వార్తలపై ఆ పార్టీ నేత చిరాగ్ పాసవాన్ ఆగ్రహం వ్యక్తం చేశారు. పరాస్‌ ఎల్జేపీలో భాగం కానందున.. పార్టీ కోటా కింద ఆయన కేంద్రమంత్రిగా నియమితులు కాలేరని చిరాగ్ వ్యాఖ్యానించారు. ‘మా పార్టీతో ప్రమేయం లేకుండా ఆయన్ను స్వతంత్రంగా మంత్రిని చేసుకోవచ్చు. ఎల్జేపీ కోటా కింద మంత్రిని చేస్తే..దాన్ని మేం కచ్చితంగా వ్యతిరేకిస్తాం. ఆ నియామకంపై కోర్టుకు వెళ్తాం’ అని చిరాగ్ మంగళవారం మీడియాకు వెల్లడించారు. 

కేంద్ర మంత్రివర్గ విస్తరణకు మోదీ సర్కారు ఈ నెల 8వ తేదీన ముహూర్తం ఖరారు చేసినట్లు వార్తలు వస్తున్నాయి. మంత్రివర్గంలో భాగం కానున్నారని భావిస్తున్న పలువురు నేతలు ఇప్పటికే దిల్లీకి పయమనమయ్యారు. ఈ క్రమంలోనే చిరాగ్ స్పందన వెలువడింది. దళిత నేత, దివంగత రామ్ విలాస్ పాసవాన్ నెలకొల్పిన ఎల్జేపీలో కొద్ది వారాల కిందట తిరుగుబాటు జెండా ఎగిరిన సంగతి తెలిసిందే. పాసవాన్ తమ్ముడు పశుపతి ఈ తిరుగుబాటుకు నాయకత్వం వహించి, పార్టీని చీల్చారు.