Rahul Gandhi: మోదీపై ఆరోపణలు.. రాహుల్‌ గాంధీపై చర్యలకు భాజపా డిమాండ్‌..!

దిల్లీ: ప్రధానమంత్రి నరేంద్ర మోదీపై (Narendra Modi) లోక్‌సభలో కాంగ్రెస్‌ నేత రాహుల్‌ గాంధీ (Rahul Gandhi) చేసిన ఆరోపణలపై భాజపా మండిపడింది. ఆ అభ్యంతరకర వ్యాఖ్యలను రికార్డుల నుంచి తొలగించాలని కోరింది. మంగళవారం జరిగిన ఈ విషయాన్ని తీవ్రంగా పరిగణించిన భాజపా.. బుధవారం సభ మొదలు కాగానే రాహుల్‌ గాంధీపై చర్యలు తీసుకోవాలని డిమాండ్‌ చేసింది. దీనిపై పార్లమెంటరీ వ్యవహారాల శాఖ మంత్రితో పాటు భాజపా ఎంపీలు లోక్‌సభ స్పీకర్‌కు ఫిర్యాదు చేశారు.

‘కాంగ్రెస్‌ నేత కొన్ని వ్యాఖ్యలు చేశారు. అవి అత్యంత అభ్యంతరకర, నిరాధార ఆరోపణలు. వాటిని తొలగించడంతోపాటు ఆయనపై చర్యలు తీసుకోవాలి’ అని లోక్‌సభ స్పీకర్‌ ఓం బిర్లాను పార్లమెంటరీ వ్యవహారాలశాఖ మంత్రి ప్రహ్లాద్ జోషి డిమాండ్‌ చేశారు. దీనిపై సభాహక్కుల తీర్మానాన్ని ప్రవేశపెడుతున్నామన్నారు. ఎవరైనా ఆరోపణలు చేయాలనుకుంటే ముందుగా నోటీసులు ఇవ్వాల్సి ఉంటుందన్నారు.

మరోవైపు మోదీపై నిరాధార ఆరోపణలు చేయడంతోపాటు సభను తప్పుదోవ పట్టించినందుకు రాహుల్‌ గాంధీపై చర్యలు తీసుకోవాలంటూ భాజపా ఎంపీ నిశికాంత్‌ దుబే స్పీకర్‌కు లేఖ రాశారు. రాష్ట్రపతి ప్రసంగానికి ధన్యవాదాలు చెప్పే కార్యక్రమంలో మాట్లాడిన రాహుల్‌ గాంధీ.. సభా గౌరవాన్ని దెబ్బతీసేలా వ్యవహరించారని అందులో పేర్కొన్నారు. అయితే, భాజపా నేతలు, మంత్రి చేసిన డిమాండ్లపై లోక్‌సభ స్పీకర్‌ ఓం బిర్లా తక్షణం ఎటువంటి నిర్ణయం తీసుకోలేదు. వీటిని పరిశీలిస్తానని.. అనంతరం నిర్ణయిం తీసుకుంటానని చెప్పారు.