Pawan Kalyan: రెండు -మూడు రోజుల్లో సంపూర్ణ విశ్లేషణతో స్పందిస్తా!

పరిషత్‌ ఎన్నికల్లో జనసేన విజేతలకు అభినందనలు తెలిపిన జనసేనాని

అమరావతి: ఆంధ్రప్రదేశ్‌లో ఏప్రిల్‌ 8న జరిగిన ఎంపీటీసీ, జెడ్పీటీసీ ఎన్నికల్లో పోటీ చేసిన అభ్యర్థులంతా బలమైన పోరాటం చేశారని జనసేన అధినేత పవన్‌ కల్యాణ్‌ అన్నారు. ఇప్పటివరకు అధికారికంగా ప్రకటించిన ఫలితాల ప్రకారం 177 ఎంపీటీసీ, 2 జెడ్పీటీసీ స్థానాల్లో తమ అభ్యర్థులు గెలుపొందినట్టు తెలుస్తోందన్నారు. పార్టీ తరఫున విజయం సాధించిన అభ్యర్థులందరికీ జనసేన తరఫున, జన సైనికుల తరఫున, నాయకులందరి తరఫున హృదయపూర్వక అభినందనలు తెలుపుతూ సోమవారం మధ్యాహ్నం ఓ ప్రకటన విడుదల చేశారు. ఈ ఎన్నికలు ఎలాంటి పరిస్థితుల్లో జరిగాయి? ఏ నేపథ్యంలో జరిగాయన్న అంశానికి సంబంధించిన పూర్తి సమాచారం తమ వద్ద ఉందని.. మరింత సమాచారం రావాల్సి ఉందన్నారు. దీన్ని దృష్టిలో ఉంచుకొని ఎన్నికల ఫలితాలపై రెండు మూడు రోజుల్లో సంపూర్ణ విశ్లేషణతో స్పందిస్తానని పేర్కొన్నారు. ఈ మేరకు ఓ వీడియోను కూడా పవన్‌ విడుదల చేశారు.