Kapil Sibal: పార్టీలోకి వస్తుంటారు.. పోతుంటారు..: సిబల్‌ రాజీనామాపై కాంగ్రెస్‌ నేత కామెంట్‌

కొచ్చి: కేంద్ర మాజీ మంత్రి కపిల్‌ సిబల్‌ కాంగ్రెస్‌ పార్టీకి రాజీనామా చేయడంపై ఆ పార్టీ ప్రధాన కార్యదర్శి కేసీ వేణుగోపాల్‌ స్పందించారు. పార్టీలోకి వస్తుంటారు.. బయటకు పోతుంటారు అని వ్యాఖ్యానించారు. పార్టీని వీడినందుకు ఎవరినీ నిందించలేమన్నారు. కపిల్‌ సిబల్‌ ఇప్పటికే సోనియా గాంధీకి రాసిన లేఖలో పార్టీ విలువలను తాను గట్టిగా విశ్వసిస్తున్నట్టు పేర్కొన్నారన్నారు. కాంగ్రెస్‌ చాలా పెద్ద పార్టీ అని.. ఇందులోకి అనేకమంది వస్తుంటారు.. బయటకు పోతుంటారు.. మరికొందరు ఇతర పార్టీల్లోకి వెళ్లవచ్చు అని కేసీ వేణుగోపాల్‌ వ్యాఖ్యానించారు. 

కాంగ్రెస్‌లో పూర్తిస్థాయిలో పునర్నిర్మాణం చేపడుతున్నామని.. సమగ్రమైన పునర్‌ వ్యవస్థీకరణతో ముందుకెళ్తామన్నారు. మున్ముందు అనేక మార్గదర్శకాలు వస్తాయని.. ప్రతి ఒక్కరికీ టాస్క్‌ ఉంటుందని చెప్పారు. భాజపా సారథ్యంలోని కేంద్ర ప్రభుత్వం సీబీఐ, ఇంటెలిజెన్స్‌ వంటి కేంద్ర సంస్థలను రాజకీయ ప్రత్యర్థులను వేధించేందుకు ఉపయోగించుకుంటోందని మండిపడ్డారు. గతంలో ఏ ప్రభుత్వమూ చేయనంత దుర్మార్గంగా రాజకీయ పార్టీలను నిర్మూలనకు ప్రయత్నాలు చేస్తోందన్నారు. కాంగ్రెస్‌ పార్టీ పునర్‌ వైభవం సాధిస్తుందన్న విశ్వాసం తమకు ఉందన్న వేణుగోపాల్‌.. అందుకు తగిన నేతలు కూడా ఉన్నారన్నారు. తాత్కాలికంగా అక్కడక్కడ కొన్ని  ఎదురు దెబ్బలు తగిలినా.. సమస్యల్ని అధ్యయనం చేసి పార్టీని బలోపేతం చేసి ముందుకు సాగుతామని పేర్కొన్నారు.