Mayawati: రాజకీయ పార్టీల హామీలకు లొంగిపోవద్దు.. ఓటర్లకు మాయావతి విజ్ఞప్తి

లఖ్‌నవూ: రాజకీయ పార్టీల హామీలకు లొంగిపోవద్దని బీఎస్పీ అధినేత్రి, యూపీ మాజీ సీఎం మాయావతి ఓటర్లకు విజ్ఞప్తి చేశారు. భాజపా తప్పుడు విధానాలకు యూపీ ప్రజలే తగిన గుణపాఠం నేర్పుతారన్నారు. ఎన్నికలకు ముందు పెద్ద పెద్ద హామీలతో ప్రజల్ని తప్పుదోవ పట్టిస్తూ కొన్ని రాజకీయ పార్టీలు డ్రామాలాడుతున్నాయని మండిపడ్డారు. భాజపా తప్పుడు విధానాలకు ప్రజలు బాధపడుతున్నారని, ఈ ప్రజావ్యతిరేక ప్రభుత్వానికి తగిన గుణపాఠం చెప్పేందుకు ఓటర్లంతా ఆతృతతో ఎదురుచూస్తున్నారని వ్యాఖ్యానించారు. కేవలం బీఎస్పీ మాత్రమే హింస, అల్లర్లు లేని పాలనను అందించగలదని, ఉపాధి కల్పిస్తూ అభివృద్ధికి భరోసా కల్పించగలదని ప్రజలు విశ్వసిస్తున్నారని చెప్పారు. 

రాష్ట్రంలో కోట్లాది మంది బహుజనులు, అగ్రవర్ణ పేదలు భాజపా, ఎస్పీ, కాంగ్రెస్‌ పార్టీల ప్రజావ్యతిరేక వైఖరితో నష్టపోయారని మాయవతి విమర్శించారు. దీన్ని ప్రజలు ఎప్పటికీ మరిచిపోరన్నారు. యూపీలో భాజపా కొనసాగిస్తున్న తప్పుడు విధానాలు, కుల, మత కార్యకలాపాలతో కోట్లాది మంది ప్రజలు పేదరికం, నిరుద్యోగం, ద్రవ్యోల్బణం, వలసలతో బాధపడుతున్నారంటూ ధ్వజమెత్తారు. తమకు మంచి రోజులు తీసుకురావడంలో బీఎస్పీ కచ్చితంగా ఉపయోగపడుతుందన్న విశ్వాసంతో యూపీ ప్రజలు ఉన్నారన్నారు. యూపీలాగే.. పంజాబ్‌, ఉత్తరాఖండ్‌ ప్రజలు కూడా ప్రభుత్వం మారాలని కోరుకుంటున్నారని మాయావతి అన్నారు. కొన్ని రాజకీయ పార్టీలు ప్రజల ప్రాథమిక సమస్యలైన పేదరికం, నిరుద్యోగం, ద్రవ్యోల్బణం వంటి ప్రాథమిక సమస్యలను నిర్మూలించకుండా తమ వాక్చాతుర్యంతో ఓటర్లలో భావోద్వేగాలు రెచ్చగొట్టి రాజకీయాలు చేస్తున్నారంటూ మండిపడ్డారు.