Telangana News: వైఎస్‌ షర్మిలతో మాజీ ఎంపీ పొంగులేటి శ్రీనివాస్‌రెడ్డి భేటీ

హైదరాబాద్‌: వైఎస్సార్‌ తెలంగాణ పార్టీ (వైతెపా) అధ్యక్షురాలు వైఎస్‌ షర్మిలతో ఖమ్మం మాజీ ఎంపీ పొంగులేటి శ్రీనివాస్‌రెడ్డి భేటీ అయినట్టు ఆ పార్టీ నేతలు వెల్లడించారు. గత కొంత కాలంగా భారాస అధిష్ఠానంపై అసంతృప్తిగా ఉన్న పొంగులేటి ... తాజాగా వైఎస్‌ షర్మిలతో భేటీ కావడం రాజకీయంగా ప్రాధాన్యత సంతరించుకుంది. అయితే, పొంగులేటి శ్రీనివాస్‌రెడ్డి వైతెపాలో చేరే విషయంపై స్పష్టత లేదని ఆ పార్టీ శ్రేణులు పేర్కొంటున్నాయి.

పొంగులేటి అడుగులు ఎటువైపు?

భారాసతో దూరం పెరుగుతున్న క్రమంలో మాజీ ఎంపీ పొంగులేటి శ్రీనివాస్‌రెడ్డి ఆచితూచి అడుగులు వేస్తున్నారు. ఖమ్మంలో ఇటీవల జరిగిన భారాస ఆవిర్భావ సభకు గైర్హాజరైన పొంగులేటి.. తన వర్గం నేతలు, అనుచరుల్లో ఆత్మస్థైర్యం నింపేలా తదుపరి కార్యాచరణకు సన్నద్ధమవుతున్నారు. ముఖ్యనేతలు, వివిధ నియోజకవర్గాల నుంచి తరలివచ్చిన నాయకులు, కార్యకర్తలతో ఖమ్మంలోని తన ఇంట్లో పొంగులేటి శనివారం సమావేశమయ్యారు. భారాసలో కొనసాగేందుకు ఏమాత్రం అవకాశం లేదని ముఖ్య అనుచరుల భేటీలో ఆయన ప్రస్తావించినట్లు విశ్వసనీయ సమాచారం. తదుపరి రాజకీయ నిర్ణయంపై అందరి అభిప్రాయాలు సేకరించే పనిలో నిమగ్నమైనట్లు తెలిసింది. ఏ పార్టీలోకి వెళ్తే భవిష్యత్తు బాగుంటుందనే అంశంపై ఆరా తీశారని సమాచారం. నియోజకవర్గాల వారీగా ఆత్మీయ భేటీలు కొనసాగించాలని పొంగులేటి నిర్ణయించారు.