Telangana News: అక్కడెందుకు సీఎం కేసీఆర్‌ పర్యటించలేదు?: కోదండరామ్‌

హైదరాబాద్: కాళేశ్వరం ప్రాజెక్టు డిజైన్‌లో లోపాలు, జరిగిన అవినీతిపై హైకోర్టు న్యాయమూర్తితో విచారణ జరిపించాలని తెలంగాణ జన సమితి (తెజస) అధ్యక్షుడు ప్రొఫెసర్‌ కోదండరామ్‌ డిమాండ్ చేశారు. ఈ మేరకు ఆయన నాంపల్లిలోని పార్టీ కార్యాలయంలో రణ దీక్ష చేపట్టారు. ఈ దీక్ష సాయంత్రం 4గంటల వరకు కొనసాగనుంది. కోదండరామ్‌ మాట్లాడుతూ.. ‘‘కాళేశ్వరం వరద బాధితులను ఆదుకోవడంలో రాష్ట్ర ప్రభుత్వం పూర్తిగా విఫలమైంది. నష్టపోయినవారిని తక్షణమే ఆదుకోవాలి. ప్రాజెక్టు డిజైన్ లోపం వల్ల ప్రజలు తీవ్రంగా నష్టపోయారు. గవర్నర్ భద్రాచలం వెళుతున్నారని  తెలిసి పోటీగా ముఖ్యమంత్రి అక్కడ పర్యటించారు. మరి మేడిగడ్డ, మంచిర్యాల ప్రాంతాలను సీఎం ఎందుకు సందర్శించలేదు? బాధితులను ఆదుకోకపోతే ఉద్యమాన్ని తీవ్రతరం చేస్తాం. సంతకాల సేకరణ, వినతి పత్రాల సమర్పణతోపాటు అవసరమైతే పాదయాత్ర చేస్తాం’’ అని కోదండరామ్‌ స్పష్టం చేశారు.